Rơh Tết Nguyên đán Bính Ngọ 2026 (bah 27 khay 1 tât nar 6 Tết), n’gor Lâm Đồng djôt dơn rnoh năch pâl nđaih hao âk. Tĭng UBND n’gor, dĭng lĕ rnoh năch uănh nsong, rlu rlău geh nklăp 925.000 nuĭh, hao 32% nkôp đah Tết Ất Tỵ 2025; tâm nĕ năch dak bah dih geh 62.000 nuĭh. Dĭng lĕ geh prăk pâl nđaih nklăp 1.850 rmen prăk. Năch rgum âk bah nar 2 tât nar 4 Tết; âk ntŭk rlu rlău ta Đà Lạt, Phan Thiết n’hanh Mũi Né geh dŭt âk jrô bĭch. Âk rnoh dŏng jrô bĭch rĭng lam n’gor geh 80-85%, an saơ soan wăch rgum năch rdâk hao uĕh tay, geh nău dơh an hao jêng bah nău kan tâm năm 2026.

Pâl nđaih Khánh Hoà ntơm ueh ta bôk năm mhe đah nău ueh rnôk ma năch hao âk, âk ntŭk gŭ rlu bêng râk, lĕ rnoh geh ta rơh tết Bính Ngọ 2026 lĕ geh klâp ma 2.200 rmen prăk, hao rlău 62% đah khay aơ năm e. Bâh lơ 29 khay Chạp tât lơ 5 Tết, tach ndeh păr lam ntur neh Cam Ranh geh vơt bơi tât 800 rơh mpăr đah rlău 140 rbăn năch. mdrel đah nĕ lah âk năch tât đah trong jâng. Nău kan hăn nsong ta năm mge geh âk ta ăp nkual, ăp ntŭk pâl rlưn, lam n’gor vơt geh klâp ma 320 rbăn năch gŭ rlu, hao rlău 12%, tâm nĕ năch dak bah dih geh klâp ma 120 rbăn tơ̆, hao rlău 23%. Aơ lah nău dơh nơih gay ma hun hao pâl nđaih, mpŏng tât nău ŭch geh 77 rbăn rmen prăk tâm năm 2026.

Tĭng N’gâng kan Văn hóa, Thể thao n’hanh Pâl nđaih n’gor Dak Lak, tâm 6 nar Tết (bah 17 tât 22/2), lam n’gor wơt nklăp 395.000 năch, dĭng lĕ năch pâl nđaih geh 457 rmen prăk. Nkôp đah Tết Ất Tỵ, rnoh năch hao 33% n’hanh geh prăk hao 25%. Ăp nkual, ntŭk pâl nđaih sinh thái n’hanh văn hóa nsum mpôl nkual mpeh Tây lah ntŭk tât uĕh tay, tâm rnôk mpeh bah lơ luh nar n’gur răm đah năch pâl nđaih n’hanh uănh nsong bri dak. Âk nău ƀư văn hóa, thể thao bôk năm dơi ƀư kơt giải tâm rlong duk bu klô xă Krông Ana, rgum tâm rlong duk mpan n’glău Suối Bùn (xă Sơn Hòa) n’hanh ăp bôk nău ƀư lễ hội nchrăp ƀư khay tât. Săk rnglăy uĕh aơ lah nău wăch rgum nar lơ na nê̆ bah năch pâl nđaih ta ntŭk đah nău uĕh văn hóa n’hanh ƀư ngăn ntŭk gŭ rêh.