Khánh Hòa mô dơn ntoh lư đah pâl nđaih dak lêng gôl dak ma hôm săk geh âk gay hun hao pâl nđaih nsum mpôl nơm geh bri nđĭr uĕh, mir tơm play n’hanh săk ntơr văn hóa mpeh yôk yang đŏng. Aơ lah trong rƀŏng hăn mhe kơl geh âk ntil ndơ n’hanh rêng lam nău geh tât nsum mpôl ƀon lan.

Nkual mpeh yôk yang Khánh Sơn, Khánh Vĩnh ntoh lư đah ăp mir sầu riêng, măng cụt, play đŭr Thái, bơ, prit. Lơn lah, sầu riêng Khánh Sơn hŏ njêng săk ntơ lư ta ntŭk tăch rgâl, nơm geh ndơ nsĭt tay tơm geh wăng sa têh an ƀon lan kan lŏ mir. Ăp mir tơm play nđĭr uĕh, moh khay n’hŭm ƀô kah nê, mô dơn lah tơm ndơ tăch ma hôm lah “tơm ndơ pâl nđaih” khlay đŏng. Rlău ma mir tơm sa play, mpeh yôk yang Khánh Hòa hôm geh dak me dak diăng, leng uĕh, bri krŏng njêng ntŭk dơh uĕh gay hun hao pâl nđaih bri dak nsum mpôl ƀon lan đŏng. Nkre đah nău rêh văn hóa way ơm bah ƀon lan Raglai, Rđe, Tày, Nùng, n’gor mbra hôm dơi rdâk njêng âk ndơ geh ƀư pâl nđaih uĕh  êng đŏng kơt râng lễ hội, djăt uănh chĭng gong, ndơ sa rnoi nuĭh he nơm, ta homestay ta jay rot. Yuh Nguyễn Thị Thu ta Nha Trang nklân năl rnôk hăn tât xã mpeh yôk yang Khánh Sơn pâl nđaih:

“Rnăk gâp năm aơ hao Khánh Sơn tâl bar hôm. Bri dak ri rup uĕh, trôk nar nđik uĕh. Play sa năm aơ kơt lah jŭr geh âk, măng cụt, sầu riêng dôl lăp khay klêh play. Rlău ma rlong sa kah play, rnăk gâp hôm hăn leng Tà Gụ, ta nê leng dak dŭt uĕh, nđik. Tơm si yău âk ngăn, bri krŏng nđik uĕh. Nuĭh ƀon lan dêh bên, rhŏ dŏng uĕh ngăn”.

Wa Nguyễn Trí Dũng, Groi kruanh UBND xã Tây Khánh Sơn an gĭt, ta ntŭk hŏ geh du đêt rnăk rgâl trong ntĭt leo tăch rgâl, ntuh kơl rhŏ dŏng ndơ ngêt sa, uănh pâl mir ba gay rhŏ dŏng an năch.

“Ta xã Tây Khánh Sơn geh dơh uĕh lah ăp mir tơm play têh hvi, tâm nê geh ăp rup uĕh bri dak, trôk nar nđik aih, nta trong dơh an năch hăn uănh pâl, rlong chiăm ndơ sa kah khlay bah Khánh Sơn tâm ban kơt ndơ sa mpeh nkual. Bah nê mbra wăch rgum năch pâl nđaih, nkre rgop tăch ndơ tuch tăm an kônh wa”.

Gay mât dŏng geh nău tam, n’gor Khánh Hòa ân dăp rgum nkual pâl nđaih nsum mpôl nkre đah tuch tăm, sơch ndơ geh ƀư tơm kơt sầu riêng Khánh Sơn, play rba Cam Lâm, play bŭng Diên Khánh. Nuĭh ƀon lan dơi ntrŭt nsôr tâm nkrêp kan nsum jêng hợp tác xã gay  n’hao săk geh rhŏ dŏng. N’gor ân ntuh kơl ntŭk ntô ndơ dŏng, ntop kơl rdâk njêng homestay, nkual rlong uănh, nkre kơi năp nti nău blău rhŏ dŏng, rblang mbơh, nău ngơi dak bah dih an kônh wa. Nău khlay lơn lan nkre đah tour trong hăn, rdâk njêng njăr trong hăn “dak lêng gôl dak Nha Trang – mir tơm Khánh Sơn - văn hóa Khánh Vĩnh”, nkre đah nkơnh n’hơ ta ndơ pơk mbrô n’hanh doanh nghiệp hăn jong nar wăch rgum năch pâl nđaih. Wa Nguyễn Duy Quang, Giám đốc Sở Nông nghiệp n’hanh Môi trường n’gor Khánh Hòa an gĭt:

“Lah ăp nkual mpeh yôk yang aƀaơ tăm dơi ăp ntil tơm play n’hanh nkre đah pâl nđaih bri dak ri mbra njêng du rêng pâl nđaih gay hun hao n’gâng kan pâl nđaih bah n’gor Khánh Hòa. Pâl nđaih bri dak nkre đah tuch tăm têh hvi đah ndơ geh ƀư OCOP mbra n’hao geh nău rêh nuĭh ƀon lan. Rnôk pâl nđaih nkre bah nkual dak lêng tât nkual mpeh yôk yang ri mbra geh ăp ntil ndơ OCOP, ƀon hăr blău ti kan, tuch tăm têh hvi, njêng nău nđơr mhe an hun hao pâl nđaih tâm let năp tay”.

Đah uĕh bri dak âk ntil, mir tơm rklê play n’hanh săk ntơr văn hóa uĕh êng, Khánh Hòa dôl dâk bah năp trong dơh gay ƀư mhe rup gui pâl nđaih, mô dơn kân jâng năch pâl nđaih ma dak lêng gôl dak ma hôm ma ăp rlong hăn uănh pâl nđĭr uĕh, dăch dêh n’hanh mha êng đŏng. Pâl nđaih nsum mpôl lam ƀon lan lah dơi dăp rgum ăp tŏng rêng, hun hao jŏ jong mbra jêng “mpông rlong” leo năch tât jru văn hóa n’hanh bri dak Khánh Hòa, njêng suan ntrôl mhe hun hao wăng sa an n’gor./.