Tĭng rnoh kơp bôk năp, Đắk Lắk lĕ geh kơp dơn 1 hê nuĭh khĭt, âk ngih jay lĕ rlâm plôk chor, drăp ndơ khuch roh yor dak băm, du đê̆ trong hăn geh dak băm. Đaị tá Lê Văn Hùng, groi kruanh leo tơm, Mbơh dơn nău kruanh n’gâng kan leo kan tahen n’gor Đắk Lắk an gĭt, bâh ta măng, rhiăng cán bộ, tahen lĕ geh rgum tât, rgum kan ma ca nô n’hanh ăp ntil ndơ way dŏng tât ăp nkual geh dak băm jru, ta nkual geh nglah êng gay ma ntrơn ƀon lan, ndơ̆ bu ranh, oh kon se tât ntŭk đăp mpăn.

Lôch tă geh phŭt sial, bâh ta măng, wa Đào Mỹ, groi kruanh UBND n’gor Đăk Lăk, leo kan tơm ntŭk kan kơl kan ta phường Sông Câù lĕ tât uănh năl ta ntŭk geh nău tât, ntĭm đă ndâk nsơm tay, ngăn lah mbơh an mât đăp mpăn rnôk ƀon lan plơ̆ sĭt mât kuaih ngih jay, der geh nău tât yor điện, tơm si chôt pă n’hanh ăp ntil ndơ mplônh tă phŭt. Aƀaơ, ăp mpôl kan têh ta Đăk Lăk geh kâp chăm 24/24 mông, uănh năl ăp nkual hôm nha geh dak băm, kơl an ƀon lan plơ̆ sĭt ta jay, đăp mpăn nău rêh jêng, mât kuaih ueh tơm si, uănh nău đăp mpăn trong điện, gay ma dnâk nsơm tay nău rêh n’hanh nău pah kan an geh ơm.

Djôt dơn bôk năp, lam n’gor Gia Lai geh 2 nuĭh khĭt. rlău ma nĕ, 2 nuĭh ta phường Quy Nhơn n’hanh phườngg An Nhơn geh sôt rmanh. Kơp lor bôk năp, ta Gia Lai geh 45 rnăk jay geh rlâm lĕ rngôch, rlău 2.400 rnăk jay geh plôk chor. Phŭt mrô 13 ƀư 1 bôk duk geh ngâm, 3 ntŭk trong ta xă An Vinh geh pĭch rlâm. Ta nkual Hoài Nhơn Bắc, dak lêng hao băm rlău 3.000 rnăk mper dak lêng, jru dak băm bah 10-40cm, geh ntŭk hao tât 80cm. Hang rbăn ha ba n’hanh tuh mbô geh djơh, âk ndrôk rpu khĭt; tơm si, n’gâng điện, nthah tôl, mpông bil geh siăl rpăt, khuch djơh hô. Lam n’gor roh điện lam hvi, tâm ôp âk ntŭk geh tăch proăt, tât rnôk mbơh mô hŏ dơi nkra lĕ rngôch. Aƀaơ âk ntŭk hôm e dôl uănh nđôi, kơp khuch khat, yor du đêt nkual geh nkhah êng, mô hŏ dơi tâm ôp tâm mâp.

Ta n’gor Quảng Ngãi, tĭng nău kơp ê hŏ tŏng ăp, 50 ngih jay geh plôk chor, khuch khat, êng xã Long Phụng khuch khat dŭt âk đah 45 ngih jay yor sail rvoanh blông. Nău aơ an saơ ta nkual pit dak lêng n’hanh nkual rđŭng hôm nha lah ntŭk geh nău tât dŭt âk bâh phŭt sial. Mpeh trong hăn, âk trong hăn tơm geh khuch khat. Nău tât aơ an saơ mbra geh rluh neh ta nkual mpeh gôl yôk hôm nha geh âk, ngăn lah rnôk nĕ lĕ lăp dak dơh geh rluh. Aƀaơ ăp ntŭk dôl geh mbơh kơp tay nău khuch khat, ndâk nsơm lor, nkre lah tĭng uănh nđôi na nê̆ ăp nkual geh nău tât gay ma mât đăp mpăn an nuĭh ƀon lan.