Nar ntri (23/2), UBND n’gor Quảng Ngãi ƀư rơh hop jao ban bôk năm, uănh năl nô nău bah năp, tâm n’hanh bah  kơi Tết Bính Ngọ 2026 ta n’gor Quảng Ngãi. Wa Nguyễn Hoàng Giang, Kruanh UBND n’gor Quảng Ngãi dăn đă, ntơm bah ăp nar bôk năp, khay bôk năp bah năm mhe, ăp n’gâng kan, ăp ntŭk ân ngăch lăp kan dĭl, mô an geh nău mbrơi nkai, tăch pruăt lôch rơh rlu Tết.

Kruanh UBND n’gor Quảng Ngãi đă ra uănh tay lam lĕ rngôch nău dơn kan hôm nchiăng khan bah năm 2025, rgum nkra dŭt bah; nkre  ƀư jêng ngăn ngăn ăp nghị quyết bah Đảng ma trong nchrăp, rnoh tât kan, ndơ geh ƀư kloh rvah đah nuih n’hâm rgâl mhe, blău ƀư mhe, mât bôk kan lĕ n’hâm suan, geh nău dơi tam. Ăp nău kan luh hăn bôk năm, lơn lah tâm trong kan ƀư njêng, tăch rgâl, pah kan sơch lăp tahen n’hanh ăp nău dơn kan rgum tơm ân dơi ƀư ăp kôp tĭng di bôk năp kan, trong nchrăp ndơ̆ luh.