Ôi (30/7), hŏ ƀư Đại hội đại biểu Đảng bộ phường Xuân Hương- Đà Lạt lor bôk năp, năm kan 2025-2030, đah trong rƀŏng rdâk njêng phường Xuân Hương - Đà Lạt jêng du nkual gŭ rêh pâl nđaih, rhŏ dŏng, rlu rlău, ăp tŏng nău lư, têh uĕh mhe; geh mha êng mpeh trôk nar, bri dak, văn hóa lịch sử n’hanh drăp ndơ ơm yău ntlơi an tay rdâk njêng gưl neh dak, nkual n’hanh lam ntŭr neh.

Lah ta đại hội, wa Y Thanh Hà Niê Kđăm, Bí thư Tỉnh ủy Lâm Đồng đă phường Xuân Hương -Đà Lạt ân uănh năl jru lơn nău dơh uĕh, săk geh bah he, ntrŏng kloh ntŭk gŭ kan têh khlay, lah ntŭk rgum kan chính trị - văn hóa bah n’gor Lâm Đồng. Gay tĭng ƀư geh nău dơi ăp rnoh tât kan, nău dơn kan ndơ̆ luh, wa Y Thanh Hà Niê Kđăm dăn đă bah meng n’hao dăng pah kan rdâk njêng Đảng n’hanh lam trong kan chính trị kloh uĕh, nâp dăng, Đảng bộ phường Xuân Hương - Đà Lạt ân n’hao nău dơi rđău kan, suan rlăch ndăng bah mpôl kan Đảng tâm dâng nkre đah rdâk njêng rmôt cán bộ, đảng viên tŏng di uĕh đah nău ŭch geh dơn kan tâm nô nău mhe.