Lôch du khay an ƀư n’gâng kan bar gưl, nuĭh kan ta ăp xã, phường ta Gia Lai hŏ mbrơi  lăp kan đăp mpăn n’hanh nsĭt geh nău dơi ngăn. Mô dơn glêh tam nuĭh kan, n’gâng kan ăp xã hôm dăch dêh ƀon lan lơn, ngăch nkra ăp nkô̆ nău tâm dâng. Du đêt xã hŏ geh ăp nău blău ƀư mhe tâm di, trong ƀư uĕh nsĭt tay nău dơi ngăn ngăn an nuĭh ƀon lan.

Lah ngoăy tâm ăp xã mhe dơi njêng lôch n’glăp nsum bah pe xã ơm: Mỹ Chánh, Mỹ Thành n’hanh Mỹ Cát, xã An Lương, n’gor Gia Lai aƀaơ geh rnoh hvi 54 km² n’hanh rnoh nuĭh rlău 6.000 nuĭh. Bol ntŭk pơk hvi, nuĭh ƀon lan âk mpưm, n’gâng kan xã An Lương hŏ ngăch lăp kan  đăp mpăn n’hanh an ƀư ăp nău kan rhŏ dŏng nuĭh ƀon lan. Ta ntŭk rgum ƀư siƀŭt xã, pe rmôt siƀŭt khlay hŏ dơi an ƀư lor ma keh mbrô n’hanh ƀư ta ndơ điện tử. ăp siƀŭt geh tât nău rêh nuĭh ƀon lan kơt mbơh deh, mbơh khĭt, mbơh nău geh ngăn….dơi nkra ƀư ngăch. Tâm khay bôk năp lăp kan, xã hŏ nkra ƀư bơi 700 siƀŭt ma điện tử, lĕ rngôch di nar ton da dê.

Du ntŭk dŭt njrăng uănh khlay tâm trtong ƀư bah xã lah way uănh khlay tât rlong gĭt bah nuĭh ƀon lan rnôk hăn tât pah kan. Wa Võ Thanh Hoàng, Kruanh UBND xã An Lương, nkoch:

“Rlău 1 khay lăp kan, mpôl hên năl lah đah nău dơn kan bah cán bộ way đăm gĭt nău rhŏ dŏng uĕh an nuĭh ƀon lan, tŏng di đah nău ŭch geh bah nuĭh ƀon lan. N’gâng kan ta ntŭk dŭt uănh khlay n’hanh ntuh kơl drăp ndơ dŏng. Ăp n’gâng kan êng ƀa ƀă mô hŏ rvăt năp máy sŏk mbrô yơn đơn vị geh âk nuĭh ƀon lan jêng n’gâng kan ta ntŭk hŏ rvăt năp máy kâp sŏk mbrô, mpơl luh ta bil rup. Nuĭh hăn lor bôk năp pet mbrô lor, hăn bah  kơi pet mbrô bah kơi njêng du mbor tâm mprĭp rĭng grep.”

Nău rgâl dja dơi nuĭh ƀon lan rnê âk. Wa Lê Ngọc Trọng, nuĭh ƀon lan xã An Lương đah 2 tơ̆ tât ƀư siƀŭt tâm khay an gĭt:

“Cán bộ nhih pah kan ntĭm nti ƀư ngăch, glêh tam, nkra ƀư siƀŭt an gâp tâm nar dĭl.”

Ta xã mpeh yôk Canh Vinh, lôch n’glăp nsum geh rnoh hvi bơi 260 km², bri sop nkăp, âk ƀon lan rnoi mpôl đê̆ nkual jru nkual ngai, trong nkra nkre ƀư bên đah siƀŭt mhe nkre grêt dăch ƀon lan lah nău rvê têh bah n’gâng kan ta ntŭk. Wa Dương Hiệp Hòa, Kruanh UBND xã Canh Vinh, an gĭt n’gâng kan ta ntŭk hŏ rlong lăp dŏng “ntŭk nkra ƀư siƀŭt” ta nkual gŭ ngai gay rhŏ dŏng kônh wa:

“Ntơm bah jêr jŏt ma n’gâng  kan blău ƀư mhe, njêng ăp ntŭk nkra ƀư siƀŭt an nuĭh ƀon lan. Bôk năp njêng du ntŭk dơn ƀư siƀŭt ta thôn Canh Hiển gay rhŏ dŏng an ăp thôn ta ngai kơt thôn Canh Hiệp, ƀon Canh Tiến. Hăn tât tĭng ƀư ăp ntŭk ndrung wăr gay ntop kơl nuĭh ƀon lan. Nău way blău kan n’hanh ăp ndơ ntrŭp dŏng mpeh công nghệ mbra ntop kơl ăp ƀon lan ta ngai mhâm ƀư gay nuĭh ƀon lan tât dăch, ơm nkra ăp nău ŭch geh.”

Nău dăch dêh dja hôm mpơl kloh ma rmôt cán bộ. Yuh La Thị Huyền Giang, cán bộ Ntŭk rgum ƀư siƀŭt xã Canh Vinh, nkoch:

“Rnôk an ƀư n’gâng kan 2 gưl, gâp saơ nău dăch dêh đah kônh wa n’hanh ƀon lan ta ntŭk. Rnôk hăn tât pah kan, du đêt kônh wa tât ôp ƀư siƀŭt ma mô hŏ rƀah gĭt kloh ri he nchŏng kloh, nkoch bri đah kônh wa tĭng nău ngơi ƀon lan bah he ri dơh wât lơn, nău kan rhong aih lơn.”

Rlău du khay rnôk n’glăp dŏng n’gâng kan bar gưl, n’gor Gia Lai hŏ năl geh rgâl dăng tâm pah kan rgâl dơh glêh siƀŭt, rgâl mbrô, lơn lah nău tam tâm nkra ƀư siƀŭt ma ndơ pơk dŏng bah ngai. Tĭng Mpôl lăp pơk ƀư siƀŭt gưl neh dak, Gia Lai aƀaơ dâk tâl 6/34 n’gor, nkual ƀon têh mpeh rnoh âk rhŏ dŏng nuĭh ƀon lan n’hanh doanh nghiệp. Wa Hồ Quốc Dũng, Ủy viên Trung ương Đảng, Bí thư Tỉnh ủy Gia Lai, an gĭt:

“Let năp tay tĭng trong rƀŏng mbra tâm pă gưl tay tât xã. Ăp nău kan Trung ương an nău dơi kan bah gưl n’gor yơn saơ gưl xã nkra ƀư uĕh lơn ri mbra hôm nsing nơm an gưl xã nkra ƀư đŏng. Bah meng nê geh âk nău khoah đŏng, cán bộ gưl xã aƀaơ geh 3 gưl cán bộ, cán bộ n’gor njŭr sĭt, nkuâl njŭr sĭt, cán bộ ta xã. Cán bộ ta xã ntơm lăp kan ntơm nơh geh âk nuĭh mô hŏ ăp tŏng nău blău kan, yor kơt nê̆ gay ƀư bên nău dja ân geh mông nar kơi năp nti, ntĭm nti gay cán bộ let năp tay mât lĕ dơi nău kan.”

Nău rgâl mhe, glêh tam, grêt dăch ƀon lan bah n’gâng kan gưl xã ta Gia Lai lôch du khay an ƀư n’gâng kan bar gưl an saơ nău tam kloh bah trong nchrăp têh bah Đảng. Nha hôm âk nău kan ân dơi ƀư, âk wăk kol ân dơi nkra bah, yơn đah nuih n’hâm “dơn nchră ƀư” ndrel đah nău rđău đă, ndrel hăn bah Tỉnh ủy n’hanh UBND n’gor Gia Lai, n’gâng kan xã tâm trong ntĭt leo mhe mbra nar lơn ma nâp dăng, tâm ban têh đah nău dơn kan tâm rơh mhe./.