Đah đêt nău ƀư dơh ta điện thoại thông minhg, bôl dôl ta jay mô lah ta mir cà phê, wa Y Minh Niê, ta ƀon H’Đing, xă Ea Tul, n’gor Dak Lak hôm e dơh trok prăk phân poh, dak si tu ndrŭng mô lah prăk điện dak. Tĭng wa Y Minh, đah kơt dŏng ngân hàng dơi nglăp ta điện thoại thông minh, knŭng an geh boăt nthoi internet ri mô knŭng trok prăk dơh ma hôm dơi gĭt tât âk nău rhŏ prăk kaih đah prăk trok đêt, đê̆ đŏng an dơm.

Ta năp đaơ mô geh app ri gâp na nê̆ tât ngân hàng, hôm bah kơi aơ ri njuăl prăk ta điện thoại thông minh dơh dơm. Geh app ngân hàng he ntêm nkrem geh mông nar n’hanh mô roh soan hăn nsong, ta jay dơi njuăl prăk đŏng.

Hôm đah wa Nguyễn Thị Mỹ, nuĭh tơm  tăch rgâl lŭ loih choih xi măng, rhŏ an nău pâl rlưn ta thôn 5, xă Ea Tul, knơm geh kơt dŏng ngân hàng mrô, nău tâm rgâl trok prăk dơh lơn, uănh nđôi sŏk dŏng na nê̆, ngăn lah mô kâp tĭng prăk măt ma dơi rgâl tâm thẻ ngân hàng n’hanh uănh nĕ kơt du ƀap jêt. Wa Mỹ lah “nuĭh bên  ngăn” bah ngân hàng đah rnoh prăk manh rlău 4 rmen.

Manh ngân hàng 10 năm aơ hôm, Agribank kơl nta nơih manh gay hun hao wăng sa. Samƀŭt ri dơh, ngăch, sŏk an prăk tâm tài khoản. Bah năp đaơ hôm hăn ndơ̆ prăk kon ta ntŭk, hôm aƀaơ trok prăk kon knŭng an njuăl khoản, ntĭt nsa lơ 30 trok prăk kon ri nklăp lơ 25 gâp njuăl hôm.

Mô knŭng năch êng du hê, ăp hợp tác xã, doanh nghiệp lŏ mir dơi geh đŏng bah ăp nău dơh mrô. Nău tâm rgop đah ngân hàng n’hanh ngih pah kan soăy, hải quan, kho bạc kơl doanh nghiệp ƀư nău kan prăk kaih ngăch, kloh rah wah n’hanh ntêm nkrem prăk. Yuh Triệu Thị Hạnh, hợp tác xã lŏ mir n’hanh nău rhŏ Bình Minh, xă Cư M’gar nkoch:

Mpeh kế toán mpôl hên saơ app aơ dŭt dơh, mpôl hên mô kâp tât ngân hàng tâm rgâl nu nău ƀa ƀơ ma dơi ƀư lĕ rngôch ăp ntil ta app dâl, gŭ ta công ty dơi ƀư đŏng.

Mĭn rgâl mrô lah nău kan khlay gay n’hao dơi tâm rlong, ăp ngân hàng ta lam n’gor Dak Lak dôl ntrôl dăng ntĭm nuĭh ƀon lan, doanh nghiệp dŏng rhŏ nău mrô, nkre rgop tâm di săk năch hăn ndrel đah ntŭk dữ liệu ngih dak mpeh nuĭh ƀon lan. Wa Huỳnh Công Sự, Groi giám đốc ngân hang Agribank gŭ ta Cư M’gar, an gĭt:

Agribank ta Cư M’gar nkoch trêng tât nuĭh năch ƀư tĭng nău an manh n’hanh sŏk rnon đah ứng dựng E-banking, kơl bu năch ntêm nkrem prăk, mông nar, nchrăp lor tâm nău trok rnon manh. Đah ngân hàng ri ntêm nkrem ăp prăk mpeh samƀŭt, tâm rnôk hăn nsong uănh năl n’hanh du đêt prăk trok êng, n’hao săk rnglăy pah kan, kơl an ngân hàng sŏk di n’hanh sŏk tŏng, ngăch.

Ndrel đah ndơ̆ công nghệ an pơk dŏng, ăp ntŭk ngân hàng hôm uănh khlay ntĭm nti mrô an cán bộ, tâm rgop đah ăp ngih pah kan dơi kan gay ndâk ƀư trong rêh mrô tâm ban ta lam nkual. Wa Vũ Mai Sa, Groi giám đốc Agribank gŭ ta Bah lơ Dak Lak an gĭt:

 Mpôl hên dŭt n’hâm mbơh ƀư ăp ndơ rhŏ an nău dŏng công nghệ mhe, năp n’hao trong CDM/ATM tât ăp ntŭk thôn ƀon, nkual jru ngai. Rgop tâm di dữ liệu năch, sŏk joi sinh trắc học tâm di đah ntŭk dữ liệu ngih dak mpeh nuĭh ƀon lan. Rgâl ntrong ƀư, trong tâm rgâl rhŏ nău ta ntŭk kan an rhŏ nău ƀư êng n’hanh dŏng ăp ndơ, nău rhŏ ta ăp trong mrô, năch mô geh tăch proăt mpeh mông nar, ntŭk ntô rhŏ kan.

Rgâl mrô dôl jêng nuih n’hâm khlay gay trong ngân hàng Dak Lak pơk hvi lĕ rngôch rhŏ nău prăk kaih, kơl nuĭh ƀon lan nkual thôn ƀon gĭt tât prăk, trok prăk n’hanh mât uănh prăk nơih lơn. Mô knŭng “tât ta ty” kônh wa, ngân hàng mrô hôm hăn ndrel đah nuĭh ƀon lan hăn tât nkra njêng mhe, rgop ƀư rgâl nău rƀŏng rgâl mrô ngih dak, hun hao wăng sa mrô tât tâm ƀon lan.