Nthoi tay Rơh hop tâl 10, Quốc hội khóa 15, kêng măng 12-11, tâm nchră ta hội trường mpeh trong nchrăp Luật rgâl nkra, kơi ntop du đêt nkô̆ bah Luật rnoh khlay, âk đại biểu dăn đă, nău rgâl nkra Luật ân tâm di đah n’gâng kan 2 gưl n’hanh ngăn ngăn mât uănh rnoh khlay.

 ăp đại biểu rgum rgop tâm nău rgâl nkra quy định mpeh rgâl nău dơn kan an ƀư đăp mpăn rnoh khlay tâm di đah n’gâng kan 2 gưl; rgâl moh săk du đêt ndơ tăch, rhŏ dŏng tă bah Ngih dak n’glêh an rnoh khlay n’hanh nău dơi kan, trong ƀư n’glêh an rnoh khlay; rgâl nkra, kơi ntop quy định mpeh hăn ôp uănh way rnâng kan mpeh rnoh khlay gay tâm ban ŭch đah pháp luật mpeh ôp uănh; n’glĕ nău dơi mât uănh ngih dak mpeh rnoh  khlay geh rgâl tă bah dăp rgum nuĭh kan Ngih dak….Nkre dăn đă, n’glĕ nău dơi rgâl nkra luật ân đăp mpăn dơn ngoăy đah ăp luật geh tât kơt Luật but, săm ji, Luật sŏk soăy nsĭt geh wăng sa êng nơm, Luật n’gluh an dŏng siƀŭt quy phạm pháp luật. Ân gŭ mĭn tay, ra uănh tay gay nău tâm pă dơn kan an UBND gưl xã an ƀư ăp nău kan geh tât đăp mpăn rnoh khlay tâm di let năp tay.