Ăp năm rlău aơ, kônh wa ta nkual ƀon lan K’Ho, Raglai xã Phan Sơn, n’gor Lâm Đồng way ntik n’hao nuih n’hâm tâm rnglăp, njêng suan ntrôl gay nsum suan rdâk njêng nău rêh nar lơn ma hơm răm.

Thôn Ka Líp n’hanh nkual ntêng lêng ntŭk gŭ Kai Ya, Ya Mâu, xã Phan Sơn, n’gor Lâm Đồng geh lĕ rngôch rlău 700 rnăk đah bơi 3000 nuĭh, lơn âk lah nuĭh ƀon lan rnoi mpôl đê̆ K’Ho, Raglai, Chăm, Nùng. Tâm bah ri aơ nơh, nuĭh ƀon lan tâm xã nsrôih râng Rgŏ jă "lam ƀon lan tâm rnglăp rdâk njêng ƀon lan mhe, ntŭk gŭ rêh srăch uĕh". Ntơm bah bôk năm tât aƀaơ, ăp rnăk ƀon lan ta nkual ntêng lêng gŭ dja nar lơn ma rgop rlău 180 nar luh kan ƀư dak bât, kuar rvach n’hong dak, nkra trong hăn luh tât mir ba; pah kan mât kloh uĕh ntŭk gŭ rêh, rgum ndŏk n’hanh kuaih kloh uĕh n’glah gung, meng trong dơi ƀư mbro; rlău 550 rnăk tât di rnăk văn hoá (âk rlău 90%)…

Mhe aơ, kônh wa hŏ ƀư geh nău dơi Nar rgum tâm rnglăp lam rnoi nuĭh, njêng suan ntrôl gay ndrel nsum suan rdâk njêng nău rêh hơm răm. Ntŭk rgum tơm bah nar ƀư lah ăp nău kan njroh mprơ, thể thao n’hanh tâm rlong ndơ sa săk tơm văn hoá bah nuĭh K'Ho, Raglai ta aơ. Yuh Đặng Thị Thái Thuận, rnoi Chăm, gŭ ta nkual Ya Mâu, xã Phan Sơn rhơn an gĭt, yuh râng lĕ rngôch ăp ntil nău pâl rlưn kơt nsăt ƀao ƀô, têk rse, put măt mbang sŭr uk, yơn dŭt rhơn lah tâm rlong ndơ sa, yor rmôt yuh geh ndơ nkhôm rnê âk.

Khuh n’gôr bah nar rgum tâm rnglăp dŭt rhơn nđơr, kônh wa bah ăp nkual rgum sĭt ta aơ râng ăp nău pâl rlưn êt lhăt nău tâm rŏng ƀon lan. saơ ăp nuĭh rhơn nđơr da dê, dŭt ŭch râng pâl tâm rlong. Rmôt gâp geh dâk bôk năp gâl tâm rlong ndơ sa, hôm ăp gâl tâm rlong ƀa ƀă dơi geh ndơ nkhôm ntrŭt nsôr.

Nkhêp geh rnôk dja, nkual tâm ntêng lêng gŭ thôn Ka Líp, Kai Ya, Ya Mâu hŏ nsrôih râng rgop nău gay rdâk njêng nkual ƀon lan gŭ nar lơn ma hun hao. Wa Mang Ngọc Văn, nuĭh geh nsing nơm an gĭt, nar rgum năm aơ ƀư tâm rnôk lam dak dôl n’glăp dŏng n’gâng kan 2 gưl. Ntơm nơh, xã Phan Sơn n’hanh Phan Lâm ơm lah bar xã êng êng, aƀaơ n’glăp nsum jêng ngoăy, jêng ntơm bah aơ tât kêng dŭt năm nha hôm âk nău kan jăch ndăn ân ƀư ngăn, yor kơt nê̆, kônh wa ăp nkual ƀon lan gŭ n’hao nuih n’hâm tâm rnglăp, ndrel du nuih n’hâm đah n’gâng kan ta ntŭk.

N’gâng kan ta ntŭk dôl an ƀư du tơ̆ âk nău kan jêng kônh wa he ân nsum suan du nuih n’hâm. He dôl rdâk njêng nău rêh văn hoá mhe ta nkual ƀon lan gŭ yor kơt nê̆ ân ntlơi lĕ ăp nău rluk mâl ơm; ân gĭt mpêt nkrem tâm rnôk nđăp nsao, khĭt yot, kơp lĕ ma mpêt nkrem mpeh prăk kaih n’hanh mông nar, geh dơi kơt nê he mơ hun hao.

Wa Mai Hồng Đăng, Kruanh UBND xã Phan Sơn, n’gor Lâm Đồng nkoch, tâm let năp tay, n’gâng kan ta ntŭk ntrôl dăng tay, n’hao săk tam Rơh rgŏ jă “Lam ƀon lan tâm rnglăp rdâk njêng ƀon lan mhe, nkual gŭ rêh srăch uĕh”, nkre đah nău tĭng ƀư ăp rnoh tât hun hao wăng sa- rêh jêng kon nuĭh ta ntŭk. Tâm nê, ân rgum hun hao wăng sa rnăk wâl, rgâl trong ntĭt leo tuch tăm tâm di, n’hao săk geh nău rêh n’hanh n’hŭch ach o jŏ jong. N’gâng kan ta ntŭk dôl geh trong rƀŏng tâm di an hun hao tăch rgâl, pâl nđaih đŏng.

N’gâng kan gŭ ta trong Quốc lộ 28B lĕ rngôch rnoh jong lah 37 km, tâm let năp tay n’gâng kan ta ntŭk mbra gŭ mĭn ăp quy định gay ntrôl dăng tăch rgâl rhŏ dŏng ta njăr trong dja n’hanh ta ntŭk geh dak bât dak me Sông Luỹ dŭt hvi n’hanh uĕh đŏng, aơ lah ngoăy tâm ăp ntŭk wăch rgum pâl nđaih lah he ntik n’hao lĕ săk geh, dơh uĕh.

N’gor Lâm Đồng lôch rnôk n’glăp nsum lah n’gor geh rnoh neh dŭt hvi lam dak, đah 49 rnoi nuĭh oh nô ndrel gŭ rêh, mbrach jong bah yôk bri Tây Nguyên tât ăp xã meng dak lêng, geh nău way ơm âk mpưm, săk tơm rnoi nuĭh.