Lơ 24/9, rmôt kan ntoh măt Quốc hội bah n’gor Lâm Đồng ƀư tâm mâp cử tri bah nau kan sŏng tâm Ngih rƀŭn n’gor uỷ ta Đà Lạt ndrel trực tuyến tât 37 ntŭk ƀoh nau ngơi tâm n’gor đah rlau 2000 cử tri ăp xã, phường râng. Tâm nar mâp, rmôt kan mbơh: Rơh rƀŭn tal 10, Quốc hội gưl XV mra ƀư ntơm lơ 20/10 tât lơ 12/12 Quốc hội mra uănh, ntrŭnh 43 nau kan luật, nau ntrŭnh; 12 rmôt nkô̆ nau tât nau kan văng sa, rêh jêng ndrel ăp nau kan khlay êng...Cử tri n’gor Lâm Đồng ntoh nau rnơm tâm nau rđau kan bah Đảng, mêt uănh bah Quốc hội, nau rđau kan rjăp bah Chính phủ tâm nau kan hun hao văng sa, rêh jêng, đăp mpăn rnă njrăng bah neh dak.

Cử tri đă ân geh ƀư ngăch nau rđau kan bah Bộ Chính trị uănh rjăp nau ƀư nau ntĭm nti phổ thông, đăp mpăn nau pă ndrôm săm ƀŭt nti tâm ban tâm lam dak. Cử tri tâm ăp xã nkuăl jru, ngai tâm n’gor đă geh kơl an ntuh kơl nkra trong hăn gay nơih tâm nau rƀŭn rgum ndrel ntrŭt dăng tăch rgâl. Tâm nau ƀư n’gâng kan 2 gưl, hôm du đê̆ nau nkol, nau ê dơi ân geh rklaih năn gay ntrong kan geh dŏng ueh./.