Lam n’gor Kon Tum rnôk aơ geh 35 ntŭk ƀư tâm boh, tăch rgâl ndrel bơi tât 800 ntŭk yor tahen ơm ƀư tơm. Ăp nau kan rong ndrôk, be bah rmôt tahen ơm 2 nkuăl Ngọc Hồi, Đăk Glei; nau kan rong ndŭng bah tahen ơm nkuăl Sa Thầy; nau kan rong tơm dak si bah tahen ơm nkuăl Tu Mơ Rông, nkre geh nau dơi văng sa prêh, nke geh pơk hvi nau kơl an âk rhiăng tahen ơm rklaih luh ach o nâp nâl. Tahen ơm A Tôn, ƀon Pu Tá, xã Măng Ri, nkuăl Tu Mơ Rông geh mir sâm Ngọc Linh rnoh âk rmen prăk, nkoch:

            ‘Rnăk gâp tăm sâm Ngọc Linh rlau 10 năm jêh. Lah tahen ơm bah thôn ri gâp nkoch trêng, bonh đă kônh wa mpeh hun hao văng sa rnăk vâl gay oh kon geh hăn nti tât dŭt tât lôch. Tal bar lah nkoch trêng, bonh đă kônh wa mpeh khoa học tuch tăm, tơm dak si tâm nê geh sâm Ngọc Linh geh văng sa âk ngăn”.

            Rmôt tahen ơm n’gor Kon Tum geh bơi tât 19 rbăn nŭih rƀŭn tâm 111 ntŭk, tâm 10 nkuăl, nkuăl ƀon têh bah n’gor. Rnơm ƀư ueh nau kan “Tahen ơm tâm kơl huch ach o, ƀư văng sa blau”, 5 năm ma aơ rnoh rnăk ach o tâm rmôt huch ntơm 16% jur hôm 8%. Ăp gưl kan tâm n’gor kŏ kơl an ăp nŭih jut geh 500 ngih truh sat ndrel nkra mhe 44 ngih pă ân tahen ơm.

            Đại tá Võ Thanh Chín, Kruanh rmôt tahen ơm n’gor Kon Tum, Rđau kan N’gâng kan rđau tahen n’gor ơm, ntoh nau nkah ngăn tât Kruanh Hồ Chí Minh, nŭih njêng, nchiăr ndrel lah nŭih Mbŏ ŭch rŏng bah tahen; nkah tât Đại tướng Võ Nguyên Giáp, rđau kan tahen ƀon lan Việt Nam. Đại tá Võ Thanh Chín mbơh, bol ma rlu ranh, yơn ăp cán bộ gưl prêh bah tahen mro mât ueh nuih n’hâm tahen Wa Hồ:

            “Bol ma hŏ luh tahen bah jŏ yơn nuih n’hâm tahen Wa Hồ mro mpoh ang ƀư leo trong ân ăp nau kan. Phung hên rgop n’hâm, bôk rngok tâm nau kan ndâk ndrel mât neh dak. Ntĭm nti rơh mom nau ŭch rŏng dak, ƀư tơm ang nau kan cách mạng”.

            Ƀư tĭng nau ueh, nau ơm “Tahen Wa Hồ”, ăp rơh tahen ơm bah n’gor Kon Tum mro gĭt kloh ndrel uănh nau kan ndâk, mât Đảng, n’gâng kan, mât ƀon lan, mât nâp đăp mpăn chính trị, rêh jêng tâm dâng lah nau kan chính trị khlay bôk năp. Đah nuih n’hâm nau kan ƀư Nau ntrŭnh mrô 04 bah n’gor Kon Tum “Lŏ ndâk xã jêr jŏt tâm rnôk mhe’, đah nau kan ‘rmôt têm nrem, nŭih têm nkrem”, rmôt tahen ơm hŏ kơl an 2 rnăk vâl jêr jŏt tâm thôn Ktu, xã Hơ Mong, nkuăl Sa Thầy rklaih ach o nâp nala. Rnôk aơ, nau kan  nê lŏ geh ƀư ueh ndrel ntrŭnh tâm thôn Kon Hia 1, xã Đăk Rơ Ông, nkuăl Tu Mơ Rông tĭng nuih n’hâm nchrăp kan bah Rnâng kan n’gor uỷ Kon Tum.

            Mra dơi lah, nau kan tahen ơm tâm kơl n’huch ach o, ƀư văng sa mro geh ăp gưl kan Hội tâm n’gor Kon Tum ƀư geh săk tam, geh n’hâm rêng tâm âk nau kan, bah nê, rgop nau kơl an n’hao nau rêh ndrel njêng nau dơi, bonh đă ăp nŭih nsôih tâm rlong pah kan, tuch tăm, nsôih rgâl nau mĭn, nau kan. Ngăn lah, ăp nau kan yor tahen ơm ƀư hŏ rgop tâm nau ntrơn rgâl tơm tăm, mpa rong, dŏng geh nau dơi, nau dăng mpeh neh ntu, pah kan, tơm prăk gay ntuh kơl hun hao tuch tăm. Rmôt tahen ơm janh dŏng nau blau mhe tâm nau kan tuch tăm, ê nkra, mât ndrel tăch ndơ tuch tăm...Tât rnôk aơ, ta n’gor Kon Tum geh du rmôt tahen ơm pah kan jan sa, tăch rgâl; 720 nau kan mât rong, 11 ntŭk tâm boh kan nsum, 6 ntŭk rgum, 12 ntŭk kan tăch rgâl geh tahen ơm ƀư tơm, pă kan pah ân nklăp 3 rbăn 500 nŭih geh prăk đăp mpăn./.