Ăp năm rlău aơ, Tahen n’har bri n’gor Dak Lak way nchrăp nsŏng kơl, dăn đă trong rdâk njêng mpôl kan nâp dăng, mât uănh, mât njrăng nâp ƀư tơm, rnă njrăng n’har bri neh dak, rdâk nâp tay jâng nsing lam ƀon lan, ntŭk njrăng n’gang lam ƀon lan nâp dăng. Ndrel đah nê, tahen n’har bri n’gor Dak Lak hŏ tĭng ƀư jăp nău dơn kan njrăng, n’gang bah lơh joi tui ka mô tâm di, mô mbơh n’hanh mô tĭng di quy định (IUU); râng njrăng, n’gang trôk nar lơh, joi kơl nuĭh.

Đah rnoh jong rlău 189km kơh dak lêng, Dak Lak way geh hang rhiăng bôk duk mpan luh hăn dak lêng lơh nhŭp joi tui ka. Ndrel hăn đah ƀon lan lơh joi ka, ăp cán bộ, tahen n’har bri way krêp dêh dak lêng, tĭng ƀư jăp ăp nău kan pah kan njrăng n’gang n’har bri, mât jăp nău way gŭ kâp njrăng; nchrăp ntop kơl nuĭh ƀon lan lơh joi ka đăp mpăn rnă njrăng ta lam nkual dak lêng.

Ta ndrâm ka Đông Tác, Thượng úy Phan Ngọc Dương, Kruanh pôih kâp njrăng n’har bri Đà Rằng, Pôih n’har bri Tuy Hòa an gĭt: Ntơm bah bôk năm tât aƀaơ, hŏ geh hang rhiăng duk mpan tê̆ ndar ka ngừ đại dương nsrŭng tât ndrâm tăch ka, ndrel đah nê lah du rut âk mpưm duk mpan luh hăn dak lêng; lĕ rngôch dơi mât njrăng lhăt đŏng.

"Pôih gŭ kâp njrăng n’har bri Đà Rằng way geh cán bộ gŭ kâp rnôk duk mpan sĭt ndrâm dak mô lah luh bah ndrâm geh nău mât njrăng, kơp uănh tĭng nău way siƀŭt njrăng n’gang n’har bri. Kan nsum đah ndrâm ka đă n’gluh siƀŭt nchih mbơh n’hanh đăp mpăn di quy định bah pháp luật mpeh njrăng n’gang lơh joi tui ka mô tâm di ta dak lêng."

Ndrâm Phú Lạc lah ntŭk nsrŭng bah rlău 650 bôk duk ka. Ăp nar, bar pe jât bôk duk lơh joi n’hanh ndrăp ndơ n’hao tui ka ta aơ tăch an ăp nuĭh tơm rvăt rdeng nkual ƀon têh Hồ Chí Minh, Tây Nguyên n’hanh rhŏ dŏng an ăp nhih máy nkret njêng tui ka tâl nkhlŏng. Mpôl tahen n’har bri bah Pôih n’har bri Hòa Hiệp gŭ kâp ndrel nuĭh kan ta ndrâm ka nkoch trêng, ntĭm nti kônh wa tĭng ƀư ăp tŏng ăp quy định tâm trong lơh joi tui ka. Thiếu tá Lương Công Hậu, Groi kruanh Pôih n’har bri Hòa Hiệp mbơh lư:  

“Gay đăp mpăn lơh joi, ri đơn vị n’hao dăng pah kan nkoch trêng an kônh wa ƀon lan lơh joi ka gĭt trôk nar ta dak lêng; mbơh lư an kônh wa ƀon lan lơh joi ka đăp mpăn, tĭng jăp ăp nău way an lơh joi di IUU, mô tih nkual dak lêng dak bah dih. An ƀư di ăp nău way đăng ký năl uĕh di luh lăp an duk mpan, ƀư ăp siƀŭt hăn dak lêng lơh nhŭp joi".

Aƀaơ dôl lah khay lơh joi tui ka tơm. Ka joi geh âk tâm ăp bôk duk lơh joi bôk năm hŏ ƀư an nuih n’hâm nuĭh ƀon lan lơh joi ka rhơn nđơr luh hăn krêp dêh dak lêng rloh tết, nsĭt tay nău nsing nơm mpeh ăp tơ̆ hăn dak lêng geh nău dơi. Ndrel đah nău dơn kan mât njrăng ƀư tơm, ăp nuĭh tahen n’har bri lah ntŭk nsing nâp bah nuĭh ƀon lan lơh joi tui kan rnôk hăn luh dak lêng. Ntơm bah ntĭm nti ƀư siƀŭt, nkoch trêng njrăng bah lơh tih IUU, tât ntop kơl nuĭh geh tât rmoh rmanh ta dak lêng, rup gui nuĭh tahen n’har bri hŏ jêng nău way bên. Wa Hà Thanh Hùng, ta phường Phú Yên, n’gor Dak Lak, nkoch:

“Đah ăp tahen n’har bri mpôl hên dŭt rhơn bah neh kơh tâm ban kơt dak lêng gôl dak, rnôk duk mpan mpôl hên geh nău tât khuch mô lah mô ăp tŏng ntil ndơ ri oh nô tahen n’har bri kơt dŭt âk. Đah ăp nar năm mhe oh nô dŭt nta trong dơh kơl ăp ƀon lan lơh joi ka, ăp nuĭh krêp dêh dak lêng mpôl hên tât kơl n’hanh nkah ăp ntil nău mpeh ngih dak mpăng lơh”.

Gay tĭng jăp ăp quy định mpeh lơh joi tui ka, lor rnôk ăp tơ̆ hăn dak lêng, mpôl Tahen n’har bri n’gor Dak Lak kan nsum đah tơm duk mpan nkoch trêng, đăm gĭt an ƀon lan mpeh njrăng, n’gang bah lơh joi tui ka tih (IUU). Rnôk hăn kan ta dak lêng, duk mpan ân mbơh njăr trong hăn, ntrŭp ndơ groi nđôi njăr trong hăn n’hanh nchih ăp tŏng ntŭk hăn lơh joi; nhŭp joi di nkual dak lêng dơi an n’hanh mô lăp tih nkual dak lêng dak bah dih, tĭng kơn rơih “thẻ êr” bah Ủy ban Châu Âu đah Việt Nam. Đại úy Lô Văn Giới, Chính trị viên phó Pôih n’har bri Hòa Hiệp Nam, Tahen n’har bri n’gor Dak Lak, an gĭt:

“Mpôl hên nkoch trêng tât ăp nuĭh ƀon lan lơh joi ka tĭng jăp ăp quy định mpeh nhŭp lơh joi tui ka ta dak lêng, lơn lah njrăng bah lơh joi tih IUU. Bah nê, rgop ntop kơl kônh wa đăp mpăn luh hăn nklang dak lêng lơh joi di quy định, đăp mpăn mât nâp rnă njrăng ƀư tơm neh dak, nkual dak lêng bah neh dak.”

Ntơm bah ndrâm ka tât ntŭk lơh joi tui ka jru ngai, ntơm bah ăp bôk duk hăn dak lêng năm mhe tât rnôk phŭt sail tât ndal, tahen n’har bri n’gor Dak Lak way ntoh ƀư ntŭk nsing nơm bah nuĭh ƀon lan lơh joi ka. Nău ndrel hăn mô dĭl r’êl, nău dơn kan n’hanh nău tâm rŏng nuĭh nê mô dơn rgop mât nâp ƀư tơm, rnă njrăng nkual dak lêng, ma hôm êt lhăt lơn krêp dêh tahen – ƀon lan, ntop tay nău nsing nơm gay ƀon lan lơh jô ka krêp dêh dak lêng, hăn nklang jru ngai, ƀư geh ndrŏng an ƀon tơm./.