Kêng măng 15-10, Chính phủ ƀư rơh hop mpeh nău gŭ mĭn, uănh năl n’glăp nsum 3 bôk nău  kan gưl neh dak: rdâk njêng ƀon lan  mhe, n’hŭch ach o jŏ jong, hun hao wăng sa rêh jêng kon nuĭh nkual rnoi mpôl đê̆ n’hanh mpeh yôk yang. Tâm bah ri aơ nơh, nău an ƀư ăp bôk nău kan gưl neh dak geh âk nău dơi khlay, rgop uĕh tâm nău hun hao wăng sa- rêh jêng kon nuĭh bah neh dak. Bôk nău kan gưl neh dak rdâk njêng ƀon  lan mhe, bôk nău kan n’hŭch ach o jŏ jong (lvang năm 2021 - 2025) hŏ tât n’hanh rlău ăp rnoh ŭch tât geh; bôk nău kan gưl neh dak hun hao wăng sa- rêh jêng kon nuĭh nkual rnoi mpôl đê̆ n’hanh mpeh yôk yang rơh bôk năp (2021 – 2025) hŏ wat jêh 6/9 rmôt kan.

Lah rjăp ăp nkô̆ bah 3 bôk nău kan nkre đah nău hun hao thôn ƀon, joi geh trong rêh, ntŭk ntô ndơ dŏng, nuĭh ach o n’hanh rgâl geh nău rêh nkual ƀon lan mpeh yôk yang, ăp nău rgop an lah nău n’glăp nsum 3 bôk nău kan lah tâm di, đăp mpăn ăp kôp tâm mât bôk kan, ndop geh tơm ndơ, n’hao nău dơi tam ntuh kơl, tâm ban ŭch dơn ngoăy mpeh rnoh tât, trong n’glăp ntuh kơl, rêng ntĭm nti groi nđôi, nkre bah ir tâm chong cheng, n’hao nău dơi tam dŏng tơm ndơ ntuh kơl. Mpeh nău way n’glăp nsum, Groi Thủ tướng Rnâng kan Chính phủ Nguyễn Hòa Bình đă mât kơt ơm lĕ rngôch ăp rnoh tât kan, nuĭh dơi kơl hŏ dơi Quốc hội uănh an  dŏng đah lĕ 3 bôk nău kan, ntoch jong tât năm 2035; dơn nkra bah ăp nkô̆ nău tâm chong cheng dơm, n’hanh bôk nău kan mhe mô kâp rdâk njêng tay, mô kâp uănh an tay. Nhih pah kan rđău đă bah 3 bôk nău kan lah Chính phủ; Bộ Tài chính ƀư bôk tơm nsum.