Kêng măng (22/9), Bộ Chỉ huy quân sự n’gor Dak Lak ƀư bôk nău kan tâm nđŭr, tâm nchră đah ăp rơh kơn cán bộ, tahen nkhêp nkah ndray 80 năm Nar way ơm mpôl tahen rnă njrăng n’gor (23/9/1945 – 23/9/2025). Đah aƀaơ di 80 năm, nar 23/9/1945, Tỉnh bộ Việt Minh Dak Lak hŏ n’glêh an njêng Ban Quân sự n’gor, rdâk mpôl tahen n’gâng tơm lah Tiểu đoàn Giải phóng quân N’Trang Lơng n’hanh rdâk njêng lam rêng tahen bah n’gor jŭr tât tâm dâng. Rlău 8 rach năm rlăch ndăng n’hanh têh jêng, ăp rơh kơn cán bộ, tahen hŏ mô rlu n’groh an, rgop mât njrăng neh dak, jêng ntŭk nsing nâp bah Đảng, Ngih dak n’hanh ƀon lan.

Đah nkô̆ “Nâp jâng chuat ta nâm Quân kỳ quyết thắng”, rơh tâm nđŭr nsĭt tât ăp nău nkoch, nău nkah kăl e bah ăp rơh kơn kruanh rđău kan tâm ăp năm khay krit jêr, ndrel ăp nău nkoch mpeh trong nchăp rdâk njêng mpôl tahen tâm lơh mhe. Rơh mom ndăm aƀaơ mpơl nău nsrôih nđơn tay, ntik n’hao nău way ơm u che kăl e, mât nâp nău nsing nơm n’hanh trong uĕh di cách mạng đŏng. Nkhêp geh rnôk dja, Bộ Chỉ huy quân sự n’gor kan nsum đah Tỉnh đoàn Dak Lak n’glôch jêh rơh tâm rlong pơk sŏng dăng joi gĭt 80 năm Nar way ơm mpôl tahen rnă njrăng n’gor, nkhôm rnê an 28 mpôl, ăp nuĭh geh nău dơi ngăch prăl.