Bôk nău kan “Tâm nti keh mbrô” ta n’gor Dak Lak dôl dơi an lam hvi tât 102 xã, phường lam n’gor. Đah kônh wa ăp ƀon lan, nău geh bôk năp rnôk râng “Tâm nti keh mbrô” lah dơi cài đặt VNeID ta điện thoại êng nơm n’hanh ƀư ăp siƀŭt ta điện thoại bah he. Âk nău dơh êng ƀa ƀă dôl mbrơi mbơh gĭt ma rhiăng rmôt công nghệ mbrô nsum mpôl đŏng.

Nô Y Doăn Niê, ta buôn A Lê A, phường Ea Kao, nkoch nău cài đặt VNeID ta điện thoại bah he hŏ dơi ƀư đah aƀaơ bar năm n’hanh aƀaơ hŏ dơi pơk hao rnoh 2. Mhe aơ, lôch phường dơi n’glăp nsum, Bôk nău kan “Tâm nti keh mbrô” dơi an ƀư ta ntŭk, nô hŏ dơi ntĭm nti ƀư siƀŭt ta điện thoại n’hanh nô hŏ đăng ký êng hộ chiếu an kon ndăm nchrăp hăn pah kan ta Hàn Quốc tâm kêng dŭt năm aơ:

“Nchrăp ăp tŏng hồ sơ, he ƀư tĭng nău ntĭm nti bah cán bộ bah năp nê lah pơk lăp tâm Mpông rhŏ dŏng nău lư bah Bộ Công an, lôch nê tât pơk lăp tài khoản tâm ntŭk ƀư siƀŭt gưl neh dak n’hanh đăng ký tài khoản. Lôch nê, lăp tâm ntŭk ƀư hộ chiếu n’hanh nchih ăp tŏng nău lư bah mon tâm mục nộp hồ sơ bah ngai. Lôch rnôk nchih ăp tŏng ri sơch ndơ̆ prăk bah ngai ma tài khoản n’hanh ndơ̆ hộ chiếu ta jay. Lôch ndơ̆ prăk ri kâp dơn 15 nar bah kơi.”  

Lôch 3 pơh an ƀư, bôk nău kan tâm nti keh brô dôl dơi pơk hvi du trong ăp tŏng rêng ta Dak Lak. Ta âk xã, hŏ njêng ăp Rmôt công nghệ mbrô ƀon lan, đah tơm nuĭh kan ta ntŭk nơm ƀư n’gâng tơm gay nta trong dơh grêt dăch ntĭm nti tĭng nuĭh ƀon lan. Wa Y Păm Byă, Kruanh rmôt công nghệ mbrô buôn H’ra Ea H’ning, xã Dray Bhăng, n’gor Dak Lak an gĭt, lôch rnôk dơi kơi năp nti, păng hŏ rƀah gĭt kloh n’hanh mbra ntĭm nti kônh wa tâm buôn ƀư siƀŭt pơk lăp bah ngai kơt neh ntu, hộ tịch, dak si, bảo hiểm xã hội. 

“Gâp sĭt buôn mbra jă na nê̆ nuĭh ntơh măt bah 430 rnăk tâm buôn tât Jay rgum ƀon gay “nhŭp ti nchŏng kan”, ntĭm nti khân păng rƀah gĭt ăp siƀŭt. Khân păng mbra ntĭm nti tay, nkoch trêng an ăp nuĭh êng ƀa ƀă tâm rnăk he mpeh ăp siƀŭt dja. Bah nê, nar lơn ma geh âk kônh wa tâm buôn hăr blău ƀư ăp siƀŭt bah mạng n’hanh phần mềm VNeID.

N’gor Dak Lak ntrŏng công nghệ mbrô lah jâng nsing gay rdâk njêng n’gâng kan glêh tam, geh nău dơi. Yor kơt nê̆, ndơ dŏng mbrô dôl ndăn dăp rgum ăp tŏng đah lĕ rngôch ăp xã. Măt êng, bôk nău kan "Tâm kơl nti keh mbrô” dơi ntrôl dăng n’hao nău dơi blău bah nuĭh ƀon lan tâm nău dŏng lăp pơk blău ăp ntil ndơ.  

Wa Nghiêm Văn Chuẩn – Bí thư Đảng uỷ xã Đray Bhăng (n’gor Dak Lak) an gĭt, xã hŏ njêng 24 Rmôt công nghệ mbrô ƀon lan, ta 24 thôn buôn. Nău ŭch na nê̆ lah tâm khay 8 dja, ta rlău 9.700 rnăk ƀon lan bah xã, ăp rnăk geh dŭt đêt 1 hê nuĭh gĭt dŏng VNeID n’hanh tĭng ƀư dơi ăp siƀŭt ta ndơ lăp dŏng dja. Tât lĕ năm 2025, mbra tĭng ƀư bah ngai ăp siƀŭt.  

“Rmôt công nghệ mbrô nsum mpôl hŏ dơi mpôl hên kơi năp nti hăr blău n’hanh nchrăp hăn tât tĭng jay ntop kơl nhŭp ti nchŏng kan ntơh măt ăp rnăk dŏng  hăr blău trong pơk lăp ăp siƀŭt bah nuĭh ƀon lan ta trôm mạng ma điện thoại. Nău mpŏng bah mpôl hên lah ntơh măt ăp rnăk tât kêng dŭt năm 2025 mbra geh rlău 90% rnăk rƀah gĭt ăp njuat tĭng ƀư siƀŭt tơm ta trôm mạng.”

Bol an ƀư mô hŏ jŏ, bôk nău kan “Tâm nti keh mbrô” hŏ bôr jĭr mbrơi "trôm ƀah keh mbrô" ta ăp ƀon  lan Dak Lak. Nău blău lăp keh mbrô bah nuĭh ƀon  lan dơi n’hao mô dơn kơl kônh wa tât ngăch đah ndơ rhŏ dŏng pơk bah ngai ma hôm nta jâng nsing gay n’gâng kan rdâk njêng nuĭh kan glêh tam, nsĭt geh nău dơi. Nău ndel hăn, rôih dăng n’hanh “Nhŭp ti nchŏng kan” bah ăp rmôt công nghệ mbrô nsum mpôl ƀon lan tâm ban kơt pơk luh nău mpŏng mbra geh ăp “ntung nthoi mbrô” nâp đah công nghệ, n’gâng kan ta ntŭk n’hanh nuĭh ƀon lan.