Bah năp nau tât bah mih dak lip băm rleu bah rơh bah năp nơh geh lip jru ndrel nkol tâm âk ntŭk mpeh ba dâng bah n’gor, ôi lơ 20/11, Dak Lak ntrŭnh nau kuăl jă ăp cán bộ, đảng viên, ƀon lan ndrel nsum mpôl ntŭk ƀư nau kan tăch rgâl nsum ty kơl an ƀon lan nkuăl dak băm. Tâm rơh rƀŭn bah Rnâng kan rđau nau kan njrăng rdâng ôi lơ 20/11, Bí thư n’gor uỷ Lương Nguyễn Minh Triết đă rmôt kan rgum lĕ nŭih, ndơ dŏng kơl an nŭih, tât tâm nkuăl dôl nkol, kơl an ca nô jê̆ leo ndơ sa tâm ăp ntŭk Tây Hoà, Phú Hoà, Đông Hoà. Rmôt Quân khu 5 hŏ ntrŭnh rlau 100 ca nô ndrel ntop tay ndơ dŏng tă bah âk ntrong. Quân khu 5 hŏ tât tâm tach ndeh mpar Tuy Hoà gay đăp mpăn nau dơi vơt ndeh mpar kung kơl an ndoh ndơ sa leo tât./.

Mih dŭt têh bah măng 15 tât nung nar 20/11 lĕ ƀư dak lip têh ngăn ta dak me Ba, Kỳ Lộ, Bàn Thạch n’hanh ƀư dak me Srê Pốc hao ngăch, ƀư băm n’hanh nkhah êng têh hvi ta mpeh bah lơ Dak Lak. Lam n’gor djôt dơn 33.630 jay geh dak băm, rlău 11.500 rnăk geh nkhah êng, 11.242 rnăk an trơn ndal. Tahen n’har bri, Công an n’gor ndrel rmôt bah Quân khu 5, Hải quân dôl pơk hvi wơt kơl, ƀư ntŭk kâp mbơh njrăng ta ăp ntŭk phit klach. UBND n’gor lĕ ntop kơl ndal 30 rmen prăk an 60 xă, phường gay mbơh ƀư rdâng n’hanh mkra bôk năp.       

  Ôi lơ 20/11, UBND n’gor Gia Lai rƀŭn ndal mpeh nau tât mih dak lip ƀư băm jru hô tâm nkuăl mpeh ba dâng. Rnôk aơ, nklăp 20 rbăn rnăk ƀon lan geh nau khuch, bơi tât 11 rbăn tŏ nŭih hăn ntrơn du der ndal. Rmôt kan công an, tahen ndrel ăp rmôt hăn kơl an hŏ rgum geh rlau 5000 cán bộ, tahen, 15 ca nô, 43 xuồng máy ndrel ma rhiăng ndơ dŏng gay kơl an ntrơn leo, đăp mpăn nâp nâl. Dĭng lĕ ăp ngih săm ƀŭt mpeh ba dâng bah n’gor ân kon se rlu nti ndrel geh dŏng jrâu nti gay ƀư ntŭk ân ƀon lan gŭ nde./.

Lơ 20/11, n’gor Khánh Hòa ntơm kuăl jă tàu, duk mpan rdêng năch pâl nđaih bah nuĭh ƀon lan gay wơt kơl ăp nkual dôl geh nkhah êng yor dak Băm jru. Rmôt kan dơi kan tâm pă âk rmôt hăn tât ntŭk dak băm, tâm rgop đah Tahen đặc công dak, tahen n’hanh công an ndơ̆ nuĭh ƀon lan luh nkual phit klach, nkre rdêng ndơ sông sa, dak ngêt, ao n’ông tât tĭng rnăk. Kruanh UBND n’gor Trần Phong đă N’gâng kan Công thương ngăch rgŏ jă mì tôm ta ăp siêu thị gay tâm pă, nkre dŏng dŭt n’hâm, duk mpan ƀon lan dŏng gay hăn tât ăp nkual dak băm jru.