Ôi 19/11, mpôl pah kan bah Chính phủ yor Groi Thủ tướng Hồ Quốc Dũng leo trong lĕ tât uănh nđôi trong kan rdâng mih dak bŭk ta xă Diên Điền, ngoăy tâm âk nkual dak băm jru n’hanh mô nâp bah n’gor Khánh Hòa. Groi Thủ tướng đă rmôt kan dơi kan đah ăp nău, tâm nung nar, an trơn lĕ rngôch nuĭh ƀon lan ta thôn 1, thôn 2 n’hanh thôn 3, tât ntŭk đăp mpăn; nchrăp lor ndeh duk mpan, ndoh ndơ njrăng lor rnôh mih têh geh jêr jŏt. Wa lah rjăp, mô an nuĭh ƀon lan khan êng rnôk dak hao ngăch; nkre đă ƀon lan rgŏ jă tay ca nô, duk mpan wơt kơl. Ta năp nchroh mbơh mih têh hôm e geh âk ta Khánh Hòa, Dak Lak n’hanh Gia Lai, Groi Thủ tướng an gĭt Trung ương lĕ đă ăp ntŭk ndâk ƀư trong njrăng rdâng, đăp mpăn ƀon lan gŭ; nkre ntĭm rđău Quân khu 5 ntop kơl dŭt n’hâm mpeh ndơ sông sa, ndơ dŏng, tâm nĕ geh lương khô.

Groi Thủ tướng Hồ Quốc Dũng ntĭm rđău trong kan rdâng mih dak bŭk ta xă Diên Điền, n’gor Khánh Hòa

Ăp nar rlău aơ, mih têh  ntoch jong ƀư dak tu hao têh ngăch, ƀư âk nkual ta xã Krông Bông, n’gor Đắk Lắk geh băm jru, khan yơt êng. Tâm nê, thôn 27 lah ngoăy tâm ăp ntŭk geh tât khuch jru. Tĭng UBND xã Krông Bông, tât kêng măng 17/11, puăn thôn: 27, 28, 29 n’hanh 30 đah rlău 500 rnăk hŏ geh khan yơt êng lĕ rngôch. Ndrel đah nê, âk ntŭk klach rvê ntoh pĭch rlâm. N’gâng kan ta ntŭk hŏ hop ndal Ban njrăng n’gang ƀon  lan, n’hao nuĭh gŭ kâp ndăng măng nar, drăng rse nkah njrăng lor, gŭ nking ta ăp ntŭk băm jru, nkre ntrơn nuĭh ƀon lan tât ntŭk gŭ đăp mpăn. Rlău 100 cán bộ, công an, dân quân ndrel mpôl kan ta ntŭk dơi rgum du măng rsol; xã hŏ dŏng ca nô n’hanh duk mpan bah doanh nghiệp gay ntop kơl đŏng.

 Nkual bah lơ n’gor Dak Lak geh mih dŭt têh bah lơ 15 tât 19/11, yor khuch sial bah lơ. Aƀaơ 34 xă, phường mpeh bah Lơ ndrel âk xă nkual rđŭng ta nkual M’Đrắk, Krông Bông, Ea Súp, Krông Ana... dôl dak băm jru 1-1,5m, âk ntŭk nkhah êng. Rlău 1.000ha tơm tăm dak băm, rlău 300 ndrôk rpu n’hanh nklăp 5.000 kik djărr geh klôn rdu; du đêt trong hăn geh dak băm, pĭch rlâm, khuch djơh tĭng gưl. N’gâng kan ƀon lan lĕ trơn nuĭh ƀon lan luh ăp nkual geh pĭch rlâm, dak rchoh. Ôi 19/11, ta phường Sông Cầu, geh pĭch rlâm yôk ƀư rlâm jay n’hanh ƀư yuh V.T.U (33 năm deh), Bí thư Chi đoàn nkual ƀon têh Dân Phú 2, khĭt. Ăp rmôt kâp kơl lam n’gor uănh nđôi tay nu nău mih dak bŭk n’hanh mbơh ƀư ăp trong mât njrăng ƀon lan ta ăp nuĭh mô nâp rmôt kan dơi kan ndrel kônh wa ndơ̆ nuĭh khĭt ta Sông Cầu luh nkual pĭch rlâm.

Kêng măng 17-11, Mpôl đại biểu râng tâm nchră Khoa học “Lơh dơi Plei Me-Têh dăng, nkô̆ hôr n’hanh nău tă ơm gĭt kăl e” gưl Bộ Quốc phòng nkah ndray 60 năm Lơh dơi Plei Me hŏ tât n’hơr an kao, mpoh nhang nkah gĭt ăp tahen ơm dăng janh khĭt ta Nghĩa trang Liệt sĩ n’gor (phường Pleiku, n’gor Gia Lai). Tâm mông nar huêng khlay n’hanh n’guh mbah, ăp đại biểu hŏ an du mnĭt nhêp măt, n’hơr an kao n’hanh mpoh nhang nkah gĭt ăp nuĭh kon ntoh lư bah rnoi nuĭh hŏ dăng janh n’groh săk an đăp mpăn, dah rŏng bah neh dak, yor rhơn răm an ƀon lan. Lễ n’hơr an kao, mpoh nhang lah rnôk nkah tay ăp nău dơi bah ăp tahen ơm khĭt hŏ ƀư jêng nău dơi lơh Plei Me đah aƀaơ 60 năm. Lơh dơi geh nkô̆ hôr têh mpeh chính trị, tahen; lah nău n’hao êng săk bah ƀon lan ăp rnoi nuĭh n’hanh mpôl tahen Tây Nguyên, nkre rgop khlay tâm nău dơi nsum bah Mpôl tahen n’hanh ƀon lan  lam  dak.