Kêng măng 18/11, wa Tạ Anh Tuấn, Kruanh UBND n’gor Dak lak ndrel mpôl pah kan bah n’gor lĕ geh măt ta xă Yang Mao (nkuăl Krông Bông ơm) gay uănh nđôi nu nău khuch khat yor mih dak lip, ntĭm rđău ndăn trong kan rdâng, trơn ƀon lan luh nkual klach n’hanh mkra khuch khat. Tĭng nău mbơh ngăch bah UBND xă Yang Mao, rơh mih têh jŏ jong tâm ăp nar bah năp lĕ khuch hô ta lam ntŭk. Khuch khat bôk năp kơp êng rlău 40 rmen prăk. Jêh rnôk djăt nău mbơh n’hanh hăn ngăn ta ăp ntŭk pĭch rlâm hô. Wa Tạ Anh Tuấn, Kruanh UBND n’gor Dak Lak uănh lah xă Yang Mao geh pĭch rlâm neh yor rnoh dak lăp âk, ntŭk ntô yôk n’hanh âk nkual yôk hil. Ta ntŭk, Kruanh UBND n’gor đă n’gâng kan ƀon lan xă nsrôih trơn lĕ rngôch nuĭh ƀon lan rêh tâm nkual klach, lơn lah rlău 20 rnăk dôl gŭ ta ntŭk klach dŭt âk. Nău trơn an dơi ƀư dâl, mô kâp dak rhoăt.

Groi Kruanh UBND n’gor Gia Lai Dương Mah Tiệp mhe ký nau ntrŭnh đă ndal tât ăp ntŭk kan, nau kan tâm n’gor nchrăp rdâng đah ăp nau kan rdâng đah mih têh, dak buk lip ndrel rluh neh, gay n’huch ngăn nau khuch yor mih nar lơh. Tĭng nau ntrŭnh đă, UBND ăp xã, phường ân geh uănh rjăp ăp nau nkoch mbơh nkah njrăng, nchrăp njrăng đah mih têh; mbơh nkoch mpeh nau n’hoch trong nglau n’gar dak, nau tât mih dak lip, dak băm, dak rchoh, rluh neh...ndrel năn mbơh tât ăp n’gâng kan tâm dâng, nŭih ƀon lan gay ma nchrăp njrăng der. Ăp xã nchrăp ntrơn leo, hăn du luh bah nkual mra tât nau khuch; nchrăp tŏng ăp ndơ ngêt sa tâm ăp ntŭk gŭ ntrơn der, ngăn lah tâm ntŭk mra geh rluh neh ndrel băm jru. Rmôt kan, ndơ dŏng, ăp ntil nau kan geh pă dăp tĭng nau doi “4 ta ntŭk” gay mra rdâng đah mih dak buk jŏ jong, ngăn lah tâm ăp nkuăl mra geh nau nkhah kol./.

Mih têh dak lip 2 nar bah năp ta Khánh Hòa lĕ ƀư 8 nuĭh khĭt, 2 nuĭh roh, 19 nuĭh sôt rmanh; rlău 7.000ha ba n’hanh tuh mbo dak băm jru; âk ndơ ƀư khuch khat. Ta rơh rƀŭn ndal ntĭm rđău trong kan mkra khuch khat mih dak lip, Bí thư N’gor ủy Khánh Hòa Nghiêm Xuân Thành đă N’gâng kan dak si pă an nai dak si, ndoh ndơ săm ji an dơm an nuĭh rmanh; sŏk dŏng trong ƀư tơm prăk ntop kơl nuĭh ƀon lan ơm đăp mpăn nău rêh.

Wa Nghiêm Xuân Thành lah rjăp knŭng soih trong mư ngăn ngên đăp mpăn; rmôt wơt kơl an tâm rgop rjăp, tŏng ăp đăp mpăn tâm rnôk joi kơl. Ăp ntŭk mô nâp an nchrăp tŏng ăp ndeh rklư wơt kơl, kơt dŏng rgâl mrô tâm nău mbơh n’hanh njrăng rdâng mih dak lip.