Ôi 20/10, tâm trôm Rơh rƀŭn tal 10, Quốc hội khóa 15, Thủ tướng Chính phủ Phạm Minh Chính lĕ mbơh jêh ƀư tĭng trong nchrăp hun hao wăng sa-rêh jêng năm 2025, lvang 2021-2025 n’hanh nchrăp trong ƀư năm 2026. Thủ tướng lah rjăp, năm kan mhe rlău lah trong hăn bah nău mĭn nâp têh, janh dăng nâp nâl, bôk rngok mĭn mhe n’hanh mpŏng ŭch hao yor Neh dak, yor Nuĭh ƀon lan.

Việt Nam lĕ uănh nđôi lôch bah srê COVID-19, ơm pơk mpông hao tay wăng sa, dơi nsum mpôl lam ntŭr neh djôt dơn âk. Tâm rnôk jêr jŏt lam ntŭr neh, wăng sa Việt Nam hôm e mât hao jêng wăng sa âk, tâm rmôt bôk năp lam ntŭr neh. Nchrăp GDP năm 2025 hao rlău 8%; rĭng geh lvang 2021-2025 geh 6,5%. Têh jâng wăng sa hao bah 346 rmen đôlar năm 2020 hao 510 rmen đôlar năm 2025, hao 5 gưl, dăp tal 32 lam ntŭr neh; GDP rĭng bôk nuĭh geh nklăp 5.000 đôlar, âk 1,4 tơ̆ năm 2020.