Kêng măng ntri (30/12), ta Nhih pah kan Chính phủ, Thủ tướng Chính phủ Phạm Minh Chính hŏ wơt Groi Thủ tướng Chính phủ dak Cộng hòa Dân chủ Nhân dân Lào Saleumxay Kommasith nkhêp geh hăn khâl pah kan ta Việt Nam. Ta rơh wơt, Thủ tướng Chính phủ Phạm Minh Chính lah rjăp, Việt Nam way uănh khlay n’hanh an rong lor bôk năp an tâm boh têh kuâng Việt Nam-Lào. Tâm boh chính trị nar lơn ma krêp dêh êt lhăt n’hanh nsing nơm âk.

Ăp trong kan tâm boh tơm khlay êng ƀa ƀă kơt njrăng n’gang neh dak, rnă njrăng, wăng sa, văn hóa, ntĭm nti n’hanh tâm boh đah ăp n’gor bar dak dơi uănh khlay ntrŭt ntrôl n’hanh geh njuat hun hao mhe da dê. Bar ding tâm ban ŭch nsrôih kan nsum, nchrăp an dŭt uĕh an  rơh hop tâl 47 Ủy ban bar Chính phủ bar dak, nsrôih geh ăp nău dơi têh kuâng lơn tâm năm 2025. Bar ding êng uănh khlay n’hanh tâm ban ŭch njêng đăt ndal tay tâm boh wăng sa, tăch rgâl-ntuh kơl. Groi Thủ tướng Lào lah rjăp mbra ntrŭt ntrôl ăp bộ, n’gâng kan rgâl soih uĕh tay ntŭk ntuh kơl, nta trong dơh lơn an ăp doanh nghiệp dak bah dih, tâm nê geh doanh nghiệp Việt Nam ntuh kơl, tăch rgâl ta Lào.