Kêng măng 5/3, ta ngih Chính phủ, Thủ tướng Chính phủ Phạm Minh Chính lĕ mâp măt 20 Đại sứ, Ntoh măt Liên minh Châu Âu (EU) n’hanh ăp dak tâm EU ta Hà Nội di rơh bôk năm mhe Bính Ngọ. Rơh mâp ƀư tâm rnôk Việt Nam mhe ƀư lôch uĕh Đại hội đại biểu lam dak rơh tal 16 bah Đảng n’hanh Việt Nam-EU na nê̆ n’hao tâm boh Kan ndrel têh lĕ rngôch. Thủ tướng mĭn lah EU n’hanh ăp dak kan ndrel khlay bôk năp tâm nău kơl nchră nău bah Việt Nam; nău ndâk njêng trong tâm boh mhe lah nău nsing nơm chính trị nar lơ hao n’hanh geh soan an pơk hvi ta ăp ntil nău.

Uănh lah mpeh tâm boh Việt Nam-EU, Thủ tướng nkoch ŭch ăp njoăt hun hao uĕh jêh 35 năm ndâk njêng tâm boh tâm rnglăp nchră (1990-2025). Nău ƀư săk rnglăy Hiệp định Tăch rgâl dah rŏng Việt Nam-EU (EVFTA) lĕ rgop ndơ̆ EU jêng dak tăch rgâl têh tal 4 bah Việt Nam, tâm rnôk Việt Nam lah dak tăch rgâl têh ngăn bah EU tâm ASEAN. Kan ndrel tâm ăp ntil nău mât njrăng bri dak-rnă njrăng, rgâl trôk nar, lŏ mir, tư pháp, khoa học-công nghệ, ntŭk ntô gŭ âm... dôl dơi pơk hvi đah âp nău geh. Thủ tướng đă 2 ding n’hao tay kan ndrel tĭng nuih n’hanh ndrel geh, mbơh ƀư săk rnglăy EVFTA, ntrôl tăch rgâl pơk hvi n’hanh tâm ban, nta nơih an gĭt tât tăch rgâl n’hanh đăp mpăn nău geh tâm di bah doanh nghiệp 2 ding.