Kêng măng (24/09), ta Nhih pah kan Chính phủ, Thủ tướng Chính phủ Phạm Minh Chính ƀư tơm rơh hop tâl 4 Ban rđău đă bah Chính phủ mpeh hun hao khoa học công nghệ, rgâl blău ƀư mhe n’hanh Đề án 06. Tĭng ƀư Nghị quyết 57 bah Bộ Chính trị, tât aƀaơ khoa học công nghệ, rgâl blău ƀư mhe n’hanh rgâl mbrô geh ăp njuat hun hao dăng. Khay 8 năm aơ, Việt Nam tât rmôt 10 lam ntŭr neh mpeh rnoh ngăch Internet; 1/4 rnoh nuĭh dơi nkrum ƀoh 5G; sa nkra Ntŭk rgum prăp nău lư gưl neh dak mbrô 1; mât dŏng rse cáp quang ta neh kơh jong bơi 4000 km nthoi đah 5 dak.

N’gâng kan công nghiệp công nghệ mbrô năl di tay nău khlay ƀư n’gâng tơm rnôk 8 khay aơ nsĭt geh rlău 3,2 rkeh rmen prăk…Ta rơh hop, Thủ tướng Phạm Minh Chính lah kloh, ăp nghị quyết bah Bộ Chính trị mhe n’gluh an dŏng geh tât khoa học công nghệ, rgâl blău ƀư mhe, rgâl mbrô da dê; jêng ân ndăn tĭng mông, tĭng nar gay ndơ̆ khoa học công nghệ, rgâl blău ƀư mhe n’hanh rgâl mbrô lăp kan. Thủ tướng đă ndăn rdâk njêng ƀư wat jêh ntŭk mât prăp nău lư ăp n’gâng kan, ăp gưl tâm năm aơ. Thủ tướng lah rjăp nuih n’hâm an ƀư ndăn ngăch, nsĭt geh nău dơi, đăt ndal lam lĕ rngôch; ân sŏk nuĭh ƀon lan, doanh nghiệp ƀư rgum tơm, suan ntrôl, tơm ndơ bah nău hun hao. Mpeh tĭng ƀư n’gâng kan 2 gưl, Thủ tướng dăn đă rgum ƀư wat jêh rgâl mbrô, lơn lah gưl tâm dâng.