Kêng măng (24/02), ta Nhih pah kan Chính phủ, Thủ tướng Chính phủ Phạm Minh Chính mâp măt nuĭh ntơh măt ăp rnâng kan, nuĭh khoa học ntoh lư tâm trong kan dak si n’hanh Giám đốc ăp nhih dak si Trung ương nkhêp nkah ndray 71 năm nar nai dak si Việt Nam (27/02). Ta rơh mâp măt, Thủ tướng mbah rhơn ăp nuĭh khoa học, nuĭh rnâng kan, nuĭh mât bôk kan dak si, rmôt y bác sĩ, nai dak si 20 nău lah: "Mât di lĕ nuih n’hâm uĕh lŏng kan dak si – Nâp blău kan dak si – N’hao têh rblang gĭt dak si- Rlău krit jêr- lĕ rngôch yor an nuĭh ƀon lan" n’hanh dăn đă "n’gâng kan dak si mô ntlơi trong săm an nuĭh ji bol ma nău dơi hôm dŭt đêt". Thủ tướng lah rjăp, Nar nai dak si Việt Nam 27/02 lah rnôk khlay gay Chính phủ n’hanh lĕ rngôch mpơl nău nkah gĭt jru tât ăp rơh kơn nai dak si, ăp nuĭh rnâng kan, nuĭh khoa học, nuĭh mât bôk kan dak si n’hanh ăp cán bộ, nuĭh kan n’gâng kan dak si yor ăp nău rgop têh kuâng, wên jong n’hanh rŭ hôch an n’gâng kan mât chăm, mât njrăng n’hanh n’hao ngăch dăng n’hâm suan nuĭh ƀon lan.

Thủ tướng lah rjăp, Đảng, Ngih dak ntrŏng mât chăm n’hanh n’hao ngăch dăng n’hâm suan ƀon lan lah nău dơn kan chính trị dâk bôk năp, dâk ta ntŭk kan an  ƀư lor tâm ăp trong nchrăp kan têh jong, trong kơl hun hao; lah nău dơn kan bah lam trong kan chính trị, lam rêh jêng kon nuĭh n’hanh ăp nuĭh ƀon lan. Lăp tât rơh hun hao mhe bah neh dak, đah rnoh ŭch tât mô rlu n’hao ngăch dăng n’hâm suan lĕ mpeh săk suan n’hanh nuih n’hâm, lhung jong săk, jong năm rêh, săk geh nău rêh bah nuĭh ƀon lan Việt Nam, Thủ tướng dăn đă ƀư lôch jêh ăp tŏng tay trong tĭng, trong kơl n’hanh an ƀư geh nău tam ăp quy định pháp luật mpeh dak si; rgum n’hao nău dơi lam trong kan dak si, lơn lah dak si njrăng n’gang lor, dak si tâm dâng, ntik n’hao suan dăng bah y học cổ truyền. Dăp rgum tay lam n’gâng kan dak si glêh tam, đăp mpăn tâm nkrêp nsum đah ăp gưl way blău kan. Lôch jêh ăp tŏng nău dơi kan, nău dơn kan, dăp rgum nuĭh kan bah nhih dak si gưl xã.