Kêng măng ntri (01/10), Thủ tướng Chính phủ Phạm Minh Chính ƀư tơm rơh hop Chính phủ gay uănh năl nô nău tĭng ƀư, ra uănh tay, nchră ăp trong droh rklaih jêr jŏt, kŏ kol tâm nău n’glăp dŏng n’gâng kan 2 gưl. Lah n’glôch jêh rơh hop, Thủ tướng Phạm Minh Chính lah rjăp nuih n’hâm lah dâk kan tay ăp kôp n’hanh nsĭt geh nău dơi tam; ơm nkra bah ăp nău khoah aƀaơ; n’gâng kan 02 gưl ân n’glăp dŏng ăp kôp, tâm ban ŭch dơn ngoăy, rhong aih, lam lĕ rngôch, tŏng đah nău mpŏng bah Đảng, Ngih dak n’hanh ƀon lan.

Thủ tướng an lah, nuĭh kan mhe ân ƀư jăp lơn nuĭh kan ơm; nău nkra siƀŭt an nuĭh ƀon lan, doanh nghiệp ân nar lơn ma jăp uĕh, lơn lah tâm ăp trong kan: neh ntu, dăp rgum, prăk kaih, drăp ndơ, rdâk njêng, ntung trong, dak si, ntĭm nti..; ăp tŏng ntŭk mât prăp nău lư n’hanh buăt nthoi, mbluh đah trong nkra siƀŭt bah ăp n’gâng kan, ăp n’gor. Ta rơh hop Thủ tướng nchŏng kloh, aƀaơ hôm 31 rbăn nuĭh rlu kan mô hŏ dơi trok tâm prăk; dăn đă ƀư kloh nkô̆ nău, nkah njrăng lor nhih pah kan I geh prăk, geh nău n’glêh an hôm ma mô hŏ trok tâm prăk. Thủ tướng dăn đă ƀư lôch jêh lĕ trok tâm prăk an cán bộ rlu kan bah năp nar 10/10/2025.