Ta rơh hop, Thủ tướng lah kloh, rdâk mon âk jay gŭ tăch rgâl tâm di đah nău dơi trok tâm n’hanh jay gŭ an manh lah du trong nchrăp têh bah Đảng n’hanh Ngih dak. Thủ tướng dăn đă rgâl bah nău mĭn ƀư âk jay tăch rgâl jêng ƀư âk jay nkre gŭ tăch rgâl n’hanh jay gŭ an manh, tâm nê jay gŭ an manh dơi ntrŏng lah trong nchrăp têh jong, rhŏ dŏng âk mpưm ƀon lan, lơn lah công nhân, nuĭh kan, sinh viên, mpôl rnă njrăng... Thủ tướng dăn đă nkual ƀon têh Hà Nội rlong ƀư lor, ân dâk leo lor, ndăn ngăch ra uănh tay lam lĕ rngôch dăp rgum dŏng neh, dăp rgum đô thị n’hanh ƀon lan... gay geh trong dăp rgum, hun hao trong leo ƀư jay an manh; nsrôih ntơm rdâk ƀư tâm khay 6 tât.

Bộ Xây dựng lor dăn đă trong kơl mhe, trong tâm n’guăk nkrum lam ƀư jay gŭ an manh gay ăp n’gor ƀư âk jay gŭ an manh n’hanh Bộ ƀư ôp uănh, groi nđôi tay. Ndrel đah nê, Bộ Xây dựng lor nchrăp kan nsum đah ăp n’gor, bôk năp lah Hà Nội, nkual ƀon têh Hồ Chí Minh, Đồng Nai, Hải Phòng, Đà Nẵng njêng bản đồ nău ŭch geh jay an manh ƀư ntŭk nsing dăp rgum n’hanh tâm pă tơm ndơ; lor ƀư tơm kan nsum đah ăp bộ, nhih pah kan n’hanh ăp n’gor gŭ mĭn dăn đă jao nău kan na nê̆ gay ƀư njêng jay gŭ an manh lam dak, mbơh Thủ tướng tâm khay 7/2026.