Rơh tăch ndơ khay iang tal 1 năm 2025 geh ƀư dŭt têh bâh ntơm tât aƀaơ ta Việt Nam, rgum geh 2.500 doanh nghiệp, ntŭk kan tâm n’hanh bah dih dak. Đah bôk nău “tâm rgop kon nuĭh đah nău pah kan jan sa, tăch rgâl”, pah kan tăch rgâl, tăch rvăt geh ƀư ntoh n’gôr, rbăn rơh  rơh tăch ndơ, tâm ton kan n’hanh nău ton ntuh kơl, ndŏ mbơh geh tâm ton kan, đah rnoh khlăy tăch rgâl bơi tât 5 rbăn rmen prăk. Rơh tăch ndơ lĕ jêng rơh tâm mâp tâm nđur têh bâh công nghệ mĭn kan n’hanh văn hóa nghệ thuật, ntŭk mpơl na nê̆ nău khlăy tơm “Hun hao wăng sa an geh hăn ndrel đah hun hao văn hóa, rêh jêng n’hanh kon nuĭh”. Ntoh ngơi ta rơh nglôch lôch, Thủ tướng Phạm Minh Chính lah na nê̆ rơh rƀŭn nchră aơ lah du nău kan n’hao nău dŏng ta ntŭk, du nău nsrôih têh khlăy ntrôl pah kan jan sa, rvăt nglăp- du trong kan nsrôih ueh ƀư mhe ăp nău kan an hun hao nău mbơh ơm, du ntung njŏ ueh mhe tâm rgop tâm kơl tăch rgâl lam ntur neh, njêng nău hun hao an ntŭk tăch rgâl tâm dak ta rơh rnoh mbrô mhe. Thủ tướng lĕ lah ueh ăp nău lŏng nuih n’hâm, nău tâm pêt tâm kơl bâh lĕ ntŭk rêh jêng đah ƀon lan ta nkual dak buk bâh bôk nău kan “Khay iang geh âk nău knơm”, đah rnoh prăk kơl an rlău 316 rmen prăk. Thủ tướng lah na nê̆ nău tâm pêt tâm kơl lah nău ntĭt ueh ngăn an nău kan mbơh tơih dŭt khlăy nău mĭn mpôl rnoi, nău tâm pêt tâm rong bâh mpôl rnoi he, lah jâng nsan n’hanh săk soan bâh trôm an neh dak hăn ngai n’hanh nâp nâl lơn ta trong hun hao.