Nău mbơh tơih ta rơh rƀŭn nchră, ndơn kan ntŭk kan tuch tăm mât rong n’hânh ntŭk gŭ rêh an gĭt tâm pơh ba năp lĕ geh ntrŭnh nău nchrăp kan uănh nđôi, leo kan ăp nău pah kan ta ntŭk, bôk năp geh saơ, rgâl nkra mhe du đê̆ hồ sơ mô geh rmal ê hŏ mât đăp mpăn knơm ta pháp lý, đă an geh uănh nđôi, rmal tĭng di nău ntrŭnh. Mpeh nău kan mât uănh duk mpan, lĕ rngôch duk joi ka rlău 80 rbăn duk lĕ geh mbơh dăn hăn nsong uănh unh pah kan bâh ndrâm dak lêng. Nău mbơh nău mhe, mbơh tơih mpeh nău nsrôih njrăng rdang sŏk dŏng IUU bâh Việt Nam geh ntrôl dăng tay. Nglôch lôch ta rơh rƀŭn nchră, Thủ tướng rnê nău nsrôih bâh ăp n’gâng kan ntŭk kan lĕ geh răng dăng mbơh ƀư mbro, ƀa ƀơ lĕ rngôch, way geh nkre hun hao n’gâng kan tui ka nâp nâl, nkre njrăng sŏk dŏng IUU. Thủ tướng an gĭt, nchrăp mpôl kan Thanh tra EC mbra pah kan ta Việt Nam tâm khay 3, aơ lah rơh uănh nđôi ôp uănh tal 5. Thủ tướng olah na nê̆, nkô̆ ŭch dŭt têh ngăn lah mât đăp mpăn hun hao nâp nâl n’gâng kan tui ka bâh Việt Nam tĭng nău hun hao nsum, hun hao 2 rnoh mbrô, nkre lah an geh doh jăng nău nchueng rvêl IUU tĭng nău mbơh tơih bâh EC. Aơ lah nkre an hun hao ngăch nâp nâl bâh neh dak, nkre lah nău  knơm bâh ngih dak, bâh mpôl rnoi, nkre lah kơl an nău dơi geh tâm di bâh nuĭh ƀon lan.