Ôi lơ 22/11, Thủ tướng Chính phủ Phạm Minh Chính ndrel i ur ndrel rmôt kan ntoh măt gưl prêh Việt Nam, lôch rơh khâl ueh lăng rơh hăn râng rơh rƀŭn gưl prêh G20 ndrel hăn khâl ngăn dak Cộng hoà Dominica. Tâm rơh rƀŭn gưl prêh G20, Rmôt kan ntoh măt gưl prêh Việt Nam hŏ râng ăp nau kan ngăn bah rơh rƀŭn. Thủ tướng Chính phủ hŏ geh 2 nau ntoh ngơi khlay tâm ăp rơh rƀŭn nchră mpeh “Nau rdâng ji ngot ach o” ndrel ‘Hun hao nâp nâl ndrel ntrơn rgâl ŭnh nar” ndrel 35 rơh tâm mâp bar ding đah âk rđau kan ăp dak, ăp ntŭk kan lam ntur neh râng rƀŭn.

Ăp nau kan mbâl, nsôih ueh, săk tam bah Thủ tướng Chính phủ hŏ mbơh kloh rup gui Việt Nam ueh, pơk hvi “lah băl, lah dak kan nsum geh nau rnơm ndrel lah nŭih geh nau dơi tâm nsum mpôl lam ntur neh”. Tâm rnôk khâl dak Cộng hoà Dominica, Thủ tướng Chính phủ Phạm Minh Chính hŏ tâm nchră khlay, săk tam đah Tổng thống Luis Abinader Corona, bah nê bar ding tâm ban nchră nau ton lah nsum ƀư rjăp nau bah bar Chính phủ ndrel mbơh ăp nau kan geh bar ding tâm ban gay n’hao dăng lơn nau tâm boh tâm rnglăp ueh lăng đah Việt Nam ndrel Cộng hoà Dominica tâm ăp năm ba kơi./.