Nau mbơh tă bah N’gâng kan neh dak, ăp rmôt tahen ntơm bah Trung đoàn hao gŏ lơ hŏ ntrŭnh 1.800 nau kan ƀư nkah, rnoh rlau 260 rmen; rnôk aơ hŏ jêh rlau 1.400 ntŭk ndrel rlau 400 ntŭk dôl ƀư. Ăp ntŭk kan, rmôt kan, nkuăl tâm rgop ntrŭnh kơl prăk nkra, ntŭk ôp brah (tâm rnăk vâl) ân 32/34 tahen rmôt Việt Nam tuyên truyền giải phóng quân kăl e, đah rnoh 2,56 rmen. Rnôk aơ hŏ jêh 24 rnăk, hôm 8 rnăk mra jêh lôch bah năp lơ 22/12 năm aơ.

  Lam tahen ntrŭnh kơl prăk, ndâk ngih, “Ngih tâm rnglăp”, “Ngih ndrăng tahen”, jut ngih truh sat...ân ƀon lan ăp nkuăl, tât rnôk aơ geh rlau 24.900 ngih. Tâm nê, lăp gŭ di nkah 22/12 lah 15.600 ngih, rnoh hôm e ton mra lŏ ntrŭnh ƀư tâm năm 2025, đah rnoh prăk rlau 1.624 rmen. Thiếu tướng Đoàn Quang Hoà, N’gâng kan Chính sách, N’gâng kan Chính trị tahen ƀon lan Việt Nam mbơh:

            ‘Êng nau kơl an ndâk ngih tâm kơl bah tahen yor N’gâng kan Chính trị rgŏ jă tâm Định Hoá-Thái Nguyên khay 11 năm 2023 hŏ geh 40 ntŭk kan, rmôt kan lam tahen hŏ ton kơl an ndaka 3.857 ngih đah rnoh prăk lah 242,5 rmen prăk. Jêh nar rgŏ jă, ăp ntŭk kan, rmôt kan lam tahen lŏ nkoch trêng, bonh đă rgum tu tơm, kơl an ân ăp nŭih mô geh ngih gŭ. Rnoh ngih tâm kơl ân tahen geh ndâk rnôk aơ lah 12.863 ngih, lah rlet nau nchrăp 4.863 ngih”.

            N’gâng kan neh dak kŏ rđau nau kơl an prăk Binh đoàn 15 kơl ndâk 4 ngih rƀŭn rgum ân n’gor, đah rnoh rlau 12 rmen. Quân khu 1 kơl an ndâk ƀon kan mhe tâm xã Tam Kim ndrel Hoa Thám, nkuăl Nguyên Bình, n’gor Cao Bằng đah rnoh ntuh kơl rlau 70 rmen. Đại tá Nguyễn Xuân Thuỷ, Groi Kruanh n’gâng kan Tuyên huấn mbơh tay:

            ‘N’gâng kan neh dak kơl an ndâk ngih săm ƀŭt Tiểu học ndrel Trung học cơ sở Điện biên tâm xã Thanh Xương, nkuăl Điện biên, n’gor Điện Biên đah rnoh prăk 120 rmen, kơl an 10 ntŭk ân ăp rmôt tahen râng n’huch ach o nâp nâl, ndâk ƀon lan mhe, ndâk ntŭk ƀon lan gŭ tă bah tơm prăk kơl an nŭih ach o đah rnoh lah 23,8 rmen”.

            Nchrăp ân nkah 80 năm nar ndâk tahen ƀon lan Việt Nam, 35 năm nar Hội quốc phòng lam ƀon lan, mhe rlau aơ, Ban Tuyên giáo Trung ương, N’gâng kan neh dak, N’gâng kan nkoch mbơh nau tâm rgop ƀư rƀŭn mbơh ăp nau kan di nar nkah.

            Tĭng nê, âk nau kan khlay kơt N’gâng kan Chính trị tahen ƀon lan Việt Nam ƀư tơm, tâm rgop nsum ma Trung ương Đoàn druh ndăm Cộng sản Hồ Chí Minh ntrŭnh nau tâm rlong joi gĭt nau vay ơm “80 năm nar ndâk Tahen ƀon lan Việt Nam ndrel 35 năm Nar hội Quốc phòng lam ƀon lan” geh âk mpưm đoàn viên, druh ndăm kơt tĭng, râng. Rơh tâm rlong nchih lam dak “Nau nkoch tâm đại đội” ndrel tâm rlong video clip “tahen gâp rŏng”. Nau tâm rlong njroh mprơ mpeh bôk nau kan neh dak lam ƀon lan ndrel ƀư tâm rlong njroh mprơ tâm lam rmôt tahen ndrel druh ndăm, sinh viên tal 10. Quân uỷ Trung ương, N’gâng kan neh dak hŏ rđau ăp ntŭk kan, rmôt kan tâm lam tahen nchrăp tâm rgop ma ăp ntŭk kan nkoch mbơh nau, báo chí Trung ương ndrel n’gor ntrŭnh dăng nau nkoch trêng bah tahen hen, neh dak, nkoch trêng mpeh tahen, rgŏ jă nau tâm rlong “Ntô̆ n’hao nau ơm yau-Nchih nkoch tay nau kan, tâm di nau dơi tahen Wa Hồ”.

     Ngăn lah di nar nkah, n’gâng kan neh dak ƀư nau mpla n’hơ neh dak lam ntur neh Việt Nam tal 2, ta tach ndeh mpar Gia Lâm, nkuăl ƀon têh Hà Nội nchrăp ƀư ntơm lơ 19-22/12, đah nau dăng, nau âk hvi rlau rđil rơh bôk năp. Nau nkah 80 năm nar ndâk tahen ƀon lan Việt Nam ndrel 35 năm nar Hội Quốc phòng lam ƀon lan mra geh ƀư tâm ôi 20/12/2024 tâm Ntŭk rƀŭn rgum bah neh dak./.