Ntơm bah năm 2021 tât aƀaơ, n’gor Dak Lak hŏ nkra, mon mhe bơi 5.600 mblâm jay kơl rnăk nuĭh geh n’hâm suan; rnăk ach o, dăch kêng ach o; rnăk dơi kơl. Aƀaơ n’gor dôl nsrôih tât lĕ năm 2025 mbra jut jăng nhih jay nkưp nde, truh sat. Tĭng ra uănh tay bah ăp nkuâl, aƀaơ n’gor Dak Lak nha hôm 9.569 rnăk dôl jêr jŏt mpeh jay gŭ.

Wa Nguyễn Hoàng Giang, Giám đốc Sở Lao động Thương binh n’hanh Xã hội n’gor Dak Lak an gĭt, tĭng ƀư trong leo tâm rlong “Nsum ti jut jăng nhih jay nkưp nde, truh sat ta lam dak tâm năm 2025” tă bah Thủ tướng Chính phủ rgŏ jă, n’gor Dak  Lak ƀư ra uănh tay, nchih rgum rƀah gĭt rnoh âk jay truh sat, nkưp nde, tâm pă ntil di nuĭh ân dơi ntop kơl. N’gor rdâk njêng trong nchrăp, tor gĭt lor tĭng ƀư bôk nău kan jut jăng nhih jay nkưp nde, truh sat ta n’gor đăp mpăn mô ntoh geh tay jay truh sat bah ăp jay mô đăp mpăn nâp uĕh.