Kêng măng (10/3), ta Ngih Chính phủ, Thủ tướng Chính phủ Phạm Minh Chính ƀư tơm rơh rƀŭn đah Rmôt pah kan đăp mpăn rnă njrăng ŭnh nar, tâm nchră ăp trong mkra gay đăp mpăn tăch ŭnh nar, đăp mpăng rnoh khlay pring xăng. Tĭng nău mbơh, tâm rnôk ntŭk tăch pring xăng lam ntŭr neh jêr jŏt, ƀư tĭng ntĭm rđău bah Chính phủ, ăp n’gâng kan, nău kan lĕ lăp dŭt n’hâm, lơn lah N’gâng kan Công thương gay đăp mpăn rnoh khlay pring xăng. Rmôt kan rnă njrăng ŭnh nar lĕ ndơ̆ trong ƀư gay đăp mpăn n’hanh uănh nđôi nu nău pring xăng tâm 3 khay, nchrăp trong ƀư an ăp khay bah năp tay.

Ntoh ngơi ta rơh rƀŭn, Thủ tướng Phạm Minh Chính lah rjăp nău rƀŏng mô an mô tŏng moh tâm rnôk nău geh. Thủ tướng lĕ nchih samƀŭt n’hanh điện tâm nchră đah ăp nuĭh kruanh geh tât ŭnh nar, pring xăng; ntrôl dăng tâm rnglăp nchră nău ŭnh nar tâm rnôk jêr jŏt; ăp n’gâng kan, nău kan, lĕ ƀư dŭt n’hâm tĭng gưl nău kan, joi tu tơm; nkre jao an dâl nghị định rgop ƀĭt joet tâm di rnoh khlay pring xăng. Thủ tướng đă rgâl ntŭk tăch pring kŏt; mbơh ƀư săk rnglăy tâm nchră bah Thủ tướng đah ăp dak kơt UAE, Kuwat... gay n’hao ntŭk tăch, đăp mpăn 30% pring xăng bah ntŭk nglăp rwăt.

Tâm rnôk aƀaơ hin, Thủ tướng kuăl jă nuĭh ƀon lan mô an klach, rwê, mô thơ tha. Lĕ rngôch ƀon lan ndrel tâm rnglăp, tâm ban ŭch rlet rlău jêr jŏt, dêr nău ndăn hăn rwăt gay ƀư jêr ntŭk tăch, nkrâm ndơ, n’hao khlay.... Thủ tướng jao an N’gâng kan Công thương rgum mĭn njêng mbơh ƀư bôk nău kan ntêm nkrem pring ngih dak; tơm prăk ntêm nkrem gay tŏng ăp rnă njrăng ŭnh nar pring xăng ngih dak.