Kêng măng 25/2, ta Nhih pah kan Chính phủ, Thủ tướng Phạm Minh Chính ƀư tơm rơh hop bôk năp năm 2026 mpeh hun hao khoa học công nghệ, rgâl blău ƀư mhe n’hanh rgâl mbrô. Thủ tướng mpư rnê nău nsrôih bah cán bộ, n’gâng kan, n’gor, mpôl doanh nghiệp, n’hanh nuĭh ƀon lan, lah rjăp ăp nău dơi hŏ geh rgop khlay tâm hun hao wăng sa- rêh jêng kon nuĭh, n’hao nău dơi mât bôk kan neh dak n’hanh săk blău rhŏ dŏng nuĭh ƀon lan. Thủ tướng lah rjăp nău ŭch rgâl dăng bah nău mĭn an ƀư tĭng bôk kan jêng mât bôk geh nău tam, sŏk ndơ geh ƀư ngăn ngăn n’hanh rnoh di nuih n’hâm bah nuĭh ƀon lan, doanh nghiệp ƀư mâng weh dŭt prêh.

Rgum tơm lah ƀư lôch jêh ăp tŏng trong tĭng, trong kơl đăt ndal, lơn lah tâm hun hao wăng sa mât prăp nău lư n’hanh trí tuệ nhân tạo. Thủ tướng đă ăp n’gâng kan ndăn rdâk njêng n’hanh hao rblang dăn n’gluh an dŏng siƀŭt ntĭm nti ăp Luật rgâl mbrô, Trí tuệ nhân tạo, Rnă njrăng mạng, Tăch rgâl điện tử đăp mpăn rnôk n’gluh an dŏng n’hanh geh nău tam ƀư ăp kôp đah luật, der blŏng ƀah tâm di. Bộ Công an gŭ mĭn, rdâk njêng hao rblang dăn Chính phủ n’gluh an dŏng: Nghị định mpeh trong tâm n’guăk kan đăt ndal hun hao bah Ntŭk rgum blău ƀư mhe, mât dŏng rgum prăp nău lư mpeh Ntŭk rgum prăp nău lư gưl neh dak, ƀư lôch jêh tâm Quý I/2026.