Kêng măng 18/11, dơn nău jă bah Thủ tướng Cộng hòa Dân chủ Nhân dân Algeria Sifi Ghrieb, Thủ tướng Chính phủ Phạm Minh Chính ndrel I ur n’hanh Mpôl đại biểu gưl prêh Việt nam lĕ tât tach ndeh păr quốc tế Houari Boumediene Alger, Algeria ntơm hăn khâl na nê̆ Algeria. Rơh khâl Algeria bah Thủ tướng Chính phủ Phạm Minh Chính rơh aơ geh nkô̆ nău khlay tâm nău ntrôl tâm boh kan ndrel đah 2 dak hao prêh mhe, pơk luh rach năm kan ndrel jru hvi n’hanh ngăch.

Aơ di an 2 dak tâm nchră, ký ton ăp tâm ton kan ndrel mhe, lơn lah tâm ăp ntil nău ma Việt Nam n’hanh Algeria geh âk n’hanh nău ŭch ntop ndrel, kơt ŭnh nar, pring xăng, lŏ mir, khai khoáng, nkret njêng ndơ sông sa n’hanh ăp nău kan công nghiệp ê nkra. Nkre, nău ntrôl ăp trong kan ndrel wăng sa, ăp rƀŭn nchră tâm rgâl tăch ndơ n’hanh ăp nău nchrăp ƀư tăch rgâl ăp ding mbra rgop ndơ̆ tâm boh Việt Nam-Algeria hao du gưl prêh mhe.