Ntoh ngơi ta rơh rƀŭn nchră, Thủ tướng Phạm Minh Chính lah na nê̆ nău kan bâh trong loih n’hanh an lah nău hun hao ƀư trong loih mbra ntop dŭt khlăy ta nău dơh rklaih ăp nău kŏ văk tâm trong hăn. Thủ tướng lah na nê̆, Chính phủ mbra geh pă dăp prăk nău kan ƀư trong loih Lào Cai- Hà Nội- Hải Phòng n’hanh nău kan ƀư trong loih têh ta trong sâng Bắc- Nam, ƀư dŏng mpêt nkrem tât 5% rnoh tơm prăk ngih dak gay ma ntuh kơl an 2 trong hăn ƀư trong loih aơ, đă ăp n’gâng kan ăp ntŭk kan nchrăp na nê̆ ăp ndơ, ngăch ndăn pă prăk ntuh kơl.

Tâm let năp tay, Thủ tướng đă mbơh tơih ƀư ăp nău kan an geh mât đăp mpăn ueh nâp, kĩ thuật, nău ngăch kan, săk rnglăy tâm di. ăp ntŭk kan an geh rgum lĕ ăp rnoh kan mbơh tơih ăp nău kan khlăy, an geh nău kơl kan an tâm di lơn. Thủ tướng jao an UBND  ăp n’gor, nkuăl ƀon têh geh nău ƀư trong loih hăn rlet rgum ntĭm đă, ntrôl ngăch nău ntrơn ntŭk gŭ an ƀon lan, ntrơn ndơ dŏng kĩ thuật, rdâk njêng ăp ntŭk gŭ mhe ntrơn an ƀon lan.