Tâm rnôk hăn khâl ngăn Ngih dak Kuwait, Thủ tướng Chính phủ Phạm Minh Chính ndrel Mpôl ntơh măt gưl têh Việt Nam hŏ mâp cán bộ nuĭh kan nhih pah kan ntơh măt Việt Nam n’hanh mpôl nuĭh Việt Nam ta Kuwait. Ta rơh mâp, Thủ tướng Chính phủ Phạm Minh Chính an gĭt, tâm rnôk hăn khâl dja, bar dak mbra tâm ban ŭch n’hao gưl tâm boh bar ding hao du kơn prêh mhe; aƀaơ, Kuwait dôl ntuh kơl tâm Nhih máy trih pring Nghi Sơn geh lĕ rngôch tơm prăk ntuh kơl 9 rmen USD n’hanh ton pă tơm pring kât jŏ jong an Nhih máy.

Trong nchrăp lăp kan tâm kêng dŭt năm 2018 lah ngoăy tâm ăp trong nchăp ntuh kơl dak bah dih dŭt têh ta Việt Nam, ăp năm pă an nklăp 5-7 rkeh tấn pring xăng tâm dak, rgop uĕh tâm nău mât ăp tŏng dak ŭnh an Việt Nam, pă tơm ndơ an âk n’gâng kan nkret njêng tâm dak. Geh tât pah kan mpôl nuĭh Việt Nam gŭ ta dak bah dih, Thủ tướng mpŏng kônh wa ngăch dăng, rhơn răm, way tâm rnglăp, krêp dêh, tâm pă, tâm kơl nsum, way rƀŏng sĭt mpeh ƀon tơm, neh dak.