Đah nkô̆ nau “Tâm rlong n’hao ngăch, ndak ndâk rmôt Công an ƀon lan ngăn ngên kloh, nâp, dăng, rjăp, ngăch, blau, ueh mhe”, Đại hội tâm rlong “Yor đăp mpăn neh dak” tal 9 yor N’gâng kan Công an ƀư geh tâm măng 6/8, ta Hà Nội. 246 nŭih ntoh lư, ntoh măt ân âk rbăn nŭih ntoh lư, âk rmưn “nau ueh, kan ueh” tâm nau tâm rlong “Yor đăp mpăn neh dak” ndrel nau kan “Lam ƀon lan mât đăp mpăn neh dak”, rmôt janh dăng công an ƀon lan ndrel ăp tahen tâm rlong lam dak râng Đại hội. Ntoh nau tâm Đại hội, Thủ tướng Chính phủ Phạm Minh Chính lah rjăp, ăp nau dơi, nau geh, nau dăng ntoh lư bah rmôt Công an ƀon lan hŏ rgop nau khlay tâm nau mât đăp mpăn chính rị, ndâk nau rêh nar lơn ueh, đăp mpăn, rjăp dăng, nau rêh bah bon lan ueh lăng, đăp mpăn, hơm răm, pơk trong nơih ân hun hao neh dak.

Đah âk nau kan, nau ƀư mhe ueh, nau kan tâm rlong “Yor đăp mpăn neh dak” hŏ ntrŭt dăng nau rgâl mhe, blau mhe, ntrŭnh ƀư ăp nau kan mât đăp mpăn ueh, săk tam; rgop nau ƀư jêh nau kan đăp mpăn, nâp nâl; ntrŭt dăng nau râng âk mpưm, ueh bah lam ntrong kan chính trị, nŭih ƀon lan mêt neh dak. Thủ tướng đă rmôt Công an ƀon lan lŏ ƀư ueh nau vay ơm, tâm rnglăp, tâm rlong ƀư ân ueh nau kan ndâk njêng đăp mpăn neh dak, mât nâp nau đăp mpăn ƀon lan ndrel ma nau ƀư nâp nuih n’hâm ƀon lan; đăp mpăn đah nau kan chính trị, nau rêh jêng ƀon lan, mât nâp ntŭk ntu rêh jêng ueh lăng, nâp nâl gay ma hun hao neh dak./.