Ndrel đah ôp kuăl ƀon lan lam dak tâm rnglăp rƀŏng tât mpeh miền Trung ndŭl mham, Thủ tướng Chính phủ Phạm Minh Chính hŏ tât kơl na nê̆ ƀon lan miền Trung – Tây Nguyên nkra bah khuch khat trôk nar lơh.

Măng 24/11, ta Ƀon Văn hóa – Pâl nđaih ăp rnoi nuĭh Việt Nam, Thủ tướng Phạm Minh Chính râng Lễ ntơm pơk Pơh “Tâm rnglăp ăp rnoi nuĭh – Drăp ndơ ơm yău ntlơi an tay văn hóa Việt Nam” năm 2025 đah nkô̆ “Tâm rnglăp du nuih n’hâm – Rƀŏng sĭt mpeh miền Trung” n’hanh kuăl jă mpôl doanh nghiệp, nuĭh ƀon lan nsum ti ntop kơl ƀon lan miền Trung – Tây Nguyên nkra bah khuch khat dak bŭk. Nău lư ntơm bôk ma nău nchih nkoch ngăn geh ăp khuch khat dŭt hô tă bah mih dak bŭk lơh. Thủ tướng Chính phủ kuăl jă ăp mpôl kan “ndrel tâm pă nău krit jêr, tâm kơl nău jêr jŏt”, nsing nơm suan dăng tâm rnglăp lam rnoi nuĭh mbra kơl neh dak rlău dơi ntul rlong, hun hao tay nâp dăng. Ta rơh lễ, ăp nsum mpôl, doanh nghiệp hŏ rgop 540 rmen prăk ntop kơl ƀon lan geh tât khuch dak bŭk.

Kêng măng 24/11, ta Ngih Chính phủ, Thủ tướng Phạm Minh Chính ndrel kruanh Chính phủ n’hanh nsum Văn phòng Chính phủ râng kơl ƀon lan miền Trung geh khuch khat yor phŭt dak bŭk đah nuih n’hâm “tâm yô̆, tâm kơl”, du cán bộ, công chức, viên chức rgop đêt ngăn du nar prăk khay. Thủ tướng đă ăp ngih pah kan geh tât ndăn jêh dự thảo nghị quyết mpeh nău kan n’hanh trong mkra khlay gay ndâk nkra khuch khat trôk nar lơh, ngăch đăp mpăn nău rêh nuĭh ƀon lan n’hanh ndrâk nkra tăch rgâl. Ndrel đah nĕ, Thủ tướng ntĭm rđău ntrôl dăng ăp trong ntrôl hao jêng wăng sa hăn ndrel đah uănh nđôi ntoh hao mhe tâm ăp khay hôm ƀa ƀă dŭt năm, đăp mpăn nău rêh jêng n’hanh mât nâp đăp mpăn têh hvi.