Thủ tướng Chính phủ Phạm Minh Chính mhe ký siƀŭt njuăl đă ăp n’gâng kan bah lơ n’hanh ăp n’gor nkra bah khuch khat dak bŭk lơh ta nkual Trung Bộ. Rơh trôk nar lơh mhe aơ khuch khat têh mpeh nuĭh n’hanh drăp ndơ, âk njăr trong hăn n’hanh ndơ ntrŭp dŏng geh pĭch rlâm, khuch khat hô, khuch jru tât nău rêh n’hanh nău kan. Nchih rgum bôk năp an saơ 42 nuĭh khĭt n’hanh roh, 6 nuĭh geh rmanh.

Thủ tướng đă ăp n’gor ntơm bah Nghệ An tât Quảng Ngãi ndrel ăp n’gâng kan geh tât an ƀư ndăn ngăch pah kan kơl nuĭh, mât chăm nuĭh rmanh, ntop kơl ndơ sa, dak ngêt, dak si n’hanh ntŭk manh rlu. Nkre, ngăch rdâk tay ndơ dŏng khlay, nchih rgum roh huach n’hanh mbơh bah năp nar 3/11, rdâk njêng trong nchăp gay hao rblang dăn Chính phủ bah năp nar 8/11. Chính phủ hŏ ntop kơl 100 rmen prăk bah tơm prăk rnă ntêm ngân sách trung ương năm 2025 an nkual ƀon têh Huế gay nkra bah khuch khat, đăp mpăn n’hanh tŏng ăp nău rêh ƀon lan.