Đah nău wăng sa nuĭh ƀon lan, tơm prăk an manh way lah nău uănh khlay dâk bôk năp. Siƀŭt manh dơh ngăch, trong kơl an manh n’hanh deh prăk kon tâm di, đăp mpăn, n’gluh an manh ngăch…lah ăp ntil nău ma ăp doanh nghiệp mpŏng kâp, kơl khân păng rƀah năn ngăch, lor nchrăp trong n’hanh tăch rgâl nsĭt geh nău dơi. Nta trong dơh gay tơm prăk lah ngoăy tâm ăp trong nkra khlay, rgop an ƀư Nghị quyết 68/2025 bah Bộ Chính trị.

Lôch bơi du năm tâm nchră đah băl tâm boh, tât khay 8 năm aơ, Công ty TNHH ƀư njêng – Tăch rgâl– Rhŏ dŏng Việt Thắng, xã Ea Kar, n’gor Dak Lak hŏ tăch n’gluh geh nău dơi du kêh ndơ 25 rbăn dép nhựa tât dak Hoa Kỳ.

Ndrĭ, lôch âk năm tâm rlong tăch geh nău dơi đah dép nhựa ta Trung Quốc, Philipine n’hanh du đêt dak ta Đông Nam Á, doanh nghiệp gưl nkuâl -xã bah Dak Lak hŏ hăn ngai tât n’gul play neh, nchrăp đah nău mpet jâk tâm rlong mhe.

Wa Nguyễn Thị Dung, Giám đốc công ty an gĭt, gay tâm rlong geh nău dơi ta ntŭk tăch dâk bôk năp lam ntŭr neh kơt Hoa Kỳ, rlău ma rnoh gĭt blău công nghệ, mât bôk kan, doanh nghiệp ân nchrăp mpeh prăk kaih gay n’hao nău dơi ƀư njêng, tŏng di nar ton ăp ndơ tăch mhe. Lah năch nsing nơm 20 năm aơ bah ăp ngân hàng ta ntŭk, wa Dung nsing nơm an lah, Việt Thắng mbra geh tŏng tơm ndơ.

“Rnôk năch nchăm dăn rvăt tay ăp kêh ndơ ri Việt Thắng ân pơk hvi nhih máy n’hanh ntuh kơl tay công nghệ gay đăp mpăn rnoh ngăch dăng ký ton đah băl tâm boh. Dŭt lap lah geh Agribank gŭ kan ta Dak Lak way ndrel hăn ntop kơl, nta trong dơh gay mpôl hên tât đah tơm prăk ntuh kơl jong dah găp tâm ăp máy móc ndơ ntrŭp dŏng n’hanh jay xưởng. Ngân hàng an manh dŭt nta trong dơh, siƀŭt glêh ngăch, n’hanh ăp tơ̆ dơn prăk manh dơh”.

Đah Công ty TNHH Thương mại Dịch vụ tăch n’gluh n’glăp Thế Kỷ, xã Dray Bhăng, n’gor Dak Lak, njăr trong ntơm bah ntơm njêng nău kan mât rong tât jêng du doanh nghiệp tăch n’gluh, an saơ nău  khlay bah tơm prăk manh n’hanh nău ngăch rplăch rnôk dŏng tơm prăk. Wa Lê Thị Tuyết Sương, Giám đốc công ty nkoch, nău dơh bah doanh nghiệp lah mbra ntik n’hao jâng nsing mât rong, dơi nta trong manh dơh, lôch nê rgâl tơm prăk ngăch ngăr tât jêng tăch n’gluh:

“Lĕ rngôch tơm prăk gâp dôl manh ngân hàng lah 3 rmen prăk. Bôk năp gâp sŏk tĭng rơh, gay ntuh kơl rdâk njêng ndrung n’gar, kon ntil, lâk nse. Lôch sŏk mplơ̆ tay tơm prăk bah mât rong djăr ri bar hê ur sai mơ hăn ntuh kơl tăch rgâl bah dih”.

Đah nău mha êng bah nkual neh nsing tâm nău săk geh âk tuch tăm ƀư jâng nsing, lơn âk ăp doanh nghiệp, rnăk tăch rgâl ta Dak Lak hŏ ntơm njêng nău kan bah tuch tăm mât rong, mô lah ntuh kơl mât rong ndrel đah tăch rgâl tơm. Yor kơt nê̆, tơm prăk an manh tuch tăm mât rong geh nău kan khlay tâm nău ntop kơl hun hao wăng  sa ƀon lan, tĭng nuih n’hâm Nghị quyết 68 bah Bộ Chính trị. N’hanh gay tĭng ƀư nău kan dja, rlău ma ăp chi nhánh, phòng giao dịch, ngân hàng hôm kan nsum đah ăp nsum mpôl njêng hang rhiăng rmôt manh tơm prăk ta ăp thôn, buôn. Wa H Ley Sia Êban, cán bộ bu ur xã Dray Bhăng, n’gor Dak Lak an gĭt, ma ăp nsum mpôl ta ntŭk, ăp rmôt an manh tơm prăk hŏ ntop kơl nuĭh ƀon nsĭt geh nău dơi tam:

“Ma nău rdâk njêng ăp rmôt manh tơm prăk ri hội viên lah ăp kônh wa ƀon lan kan lŏ mir hŏ tât dơi dơh ntơ lơn đah ăp tơm prăk manh, nkra nău ŭch geh bah he đŏng. Mô dơn nê, Agribank hŏ pơk hvi dơi tơm prăk têh lơn gay tŏng đah nău ŭch geh pơk hvi tăch rgâl bah kônh wa ƀon lan. Rnôk ma geh tơm prăk ri kônh wa nsing nơm hun hao tăch rgâl, hun hao wăng sa bah rnăk wâl”.

Tĭng wa Lê Văn Thịnh, Giám đốc Agribank gŭ kan ta Dak Lak, tâm rnôk Dak Lak hŏ tâm ntêng lêng đah dak lêng, tăch n’gluh ndơ tuch tăm nar lơn ma dơh, ngân hàng mbra geh ăp nău rgâl năn ngăch gay ntop kơl ntik n’hao nău dơh geh dja:

“Let năp tay mpôl hên geh ăp trong nchrăp dŭt na nê̆ n’hanh geh ăp nău tât dăch năch manh âk mpưm, rgum tâm năch geh tât tăch n’gluh ndơ tuch tăm. Nê lah ngoăy tâm ăp n’gâng tơm bah n’gor Dak Lak. Aƀaơ hŏ tât n’hanh hŏ geh du đêt nău ton ngăn n’hanh dôl ntrŭt ntrôl ƀư ngăch siƀŭt di tĭng rêng. Nchrăp tâm năm 2025 dja ri mbra hun hao đŏng, nsrôih tĭng ƀư rlău trong nchrăp Bộ Tài chính jao”.

Mô dơn lah nău an manh êng tơm prăk, ăp ngân hàng ta Dak Lak hŏ n’hanh dôl “ndrel hăn” geh nău tam đah doanh nghiệp n’hanh nuĭh ƀon lan. Ntơm bah tâm ton tăch n’gluh ndơ tuch tăm luh tât lam ntŭr neh an tât ăp trong ntĭt leo wăng sa rnăk wâl ta ăp ƀon lan, lĕ rngôch dôl rgop hun hao jŏ jong nâp dăng wăng sa ta ntŭk, n’hao nău rêh nuĭh ƀon lan n’hanh lah rjăp nău khlay kan n’gâng tơm bah jâng wăng sa êng bah dih ngih dak./.