Nar 4/3, ta Nhih pah kan Trung ương Đảng, Tổng Bí thư Tô Lâm ƀư tơm rơh pah kan đah Rmôt biên tập n’glôch jêh 100 năm Đảng rđău đă cách mạng Việt Nam n’hanh 40 năm tĭng ƀư Cương lĩnh rdâk njêng Neh dak tâm rơh hăn rlău chủ nghĩa Xã hội. Aơ lah rơh hop lor bôk năp lôch rnôk Ban rđău đă dơi njêng, mpơl nuih n’hâm ndăn ngăch, răp jăp, khoa học, lăp dơn nău kan têh bah Đảng he tâm rơh mhe. N’glôch jêh rơh pah kan, Tổng Bí thư Tô Lâm lah kloh nău mĭn, he dôl nchrăp an du jâng ntơm mô hŏ tă geh mha êng nê lah nkah ndray 100 năm neh dak ta nâm nău rđău đă bah Đảng Cộng sản Việt Nam n’hanh 40 năm tĭng ƀư Cương lĩnh rdâk njêng neh dak tâm rơh hăn rlău chủ nghĩa xã hội.

N’glôch jêh 100 năm lah rnôk he uănh tay lĕ rngôch du njăr trong Đảng rđău đă rnoi nuĭh: ntơm bah rlăch ndăng nsĭt tay đăp mpăn, dơn ngoăy neh dak, tât rdâk njêng n’hanh mât njrăng neh dak xã hội chủ nghĩa; ntơm bah trong nchrăp rgum mpôl tât rơh rgâl mhe lam lĕ rngôch; ntơm bah du neh dak ach o, rluk mâl jêng du dak geh ntŭk gŭ kan nar lơn ma têh khlay lam ntŭr neh. Aơ lah rnôk gay ƀư kloh trong ntĭt leo hun hao, ăp nău dơi hŏ geh, ăp mpăng đêt, nău khoah, nkô̆ nău n’hanh nău tă ơm gĭt kan. Nău khlay lơn lah nchrăp an ntŭk nsing lý luận n’hanh ngăn ngăn an n’glêh an têh jong tâm rơh hun hao mhe, rƀŏng tât năm 2045 n’hanh ngai lơn đŏng rƀŏng tât rđău đă hun hao nen năm 2130.