Ôi 1/12, Tổng Bí thư Tô Lâm ndrel I ur n’hanh Mpôl ntơh măt gưl têh dak he hŏ tât Thủ đô Vientiane, ntơm ăp nău kan tâm trôm bôk nău kan khâl gưl Ngih dak tât Lào, râng Lễ nkah ndray 50 năm nar Quốc khánh Lào n’hanh ndrel ƀư tơm rơh mâp gưl têh đah Đảng Cộng sản Việt Nam n’hanh Đảng Ƀon lan Cách mạng Lào. Lễ wơt ngăn Tổng Bí thư Tô Lâm ndrel I ur n’hanh Mpôl ntơh măt gưl têh dak he dơi ƀư rgum ta Nhih pah kan Kruanh dak tĭng nău way dŭt têh an kruanh mât bôk neh dak. Tổng Bí thư, Kruanh dak Lào Thongloun Sisoulith ƀư tơm lễ wơt.

Hăn pah kan bah Tổng Bí thư Tô Lâm lah ăp jâng ntơm khlay đah ăp dak yơn têl nkah ăp njuat hăn têh kuâng bah tâm boh oh nô Việt - Lào, dơi ntul rlong ma ŭnh ndrak tâm lơh tâm su, rlău ăp rơh rlăch ndăng krit jêr tât rơh rdâk njêng, mât njrăng, hun hao neh dak bah bar rnoi nuĭh, gay ntơm bah nê tor luh mpơl tâm boh du nuih n’hâm nsum, kloh rsang, đêt geh tâm boh đah dak bah dih. Hăn pah kan rơh dja bah Tổng Bí thư Tô Lâm lah rjăp nău nsrôih bah bar Đảng, bar Ngih dak tâm nău mât ndray, bun dăp tay n’hanh hun hao tâm boh ntĭt leo lor an bah tâm lơh tâm su, đăp mpăn n’hanh hun hao jŏ jong bah ăp dak n’hanh lĕ ma nkual.