Nsing ta siƀŭt mbơh n’hanh nău rgop ta rơh pah kan, lah n’glôch jêh, Tổng Bí thư, Kruanh dak Tô Lâm nkoch kloh nău mĭn, pah kan gŭ mĭn khoa học tơm ân dơi rgâl mhe dăng lĕ mpeh nău gĭt êng, trong tĭng, trong n’guăk ntuh kơl, leo tĭng ƀư n’hanh trong mât dŏng gay tŏng an nău ŭch geh hun hao neh dak tâm rơh mhe.

Nkoch mpeh ăp nău kan ân ƀư dĭl, Tổng Bí thư, Kruanh dak Tô Lâm jao Đảng ủy Chính phủ ƀư tơm, rđău đă, rgum tĭng ƀư 9 nău kan, lơn lah ndăn rdâk njêng trong nchrăp têh jong neh dak mpeh hun hao gŭ mĭn khoa học tơm tât năm 2045. Trong nchrăp ân ntrŏng kloh ntŭk gŭ kan, n’glĕ nău dơi kan, trong kan an ƀư lor, tơm ndơ, trong tĭng ƀư tơm, trong tâm n’guăk prăk kaih, trong tâm n’guăk uănh năl n’hanh tor luh njăr trong tĭng ƀư; mô mbrach lêng, sơch di rgum tơm, ntuh kơl tŏng jong, nkre đah nău ŭch tât hun hao ngăch, jŏ jong n’hanh ƀư tơm êng trong nchrăp têh jong.