Tâm rnôk hăn khâl gưl Ngih dak tât Cộng hòa Philippines, nar 01/6, lôch rnôk wơt gưl Ngih dak ta Nhih pah kan Malacanang, thủ đô Manila, Kruanh dak Tô Lâm ƀư rgum nchră đah Tổng thống Philippines Ferdinand Romualdez Marcos Jr. Ta tâm nchră, bar kruanh rđău kan tâm ban ŭch n’gluh nău mbơh nsum n’hao têh tâm boh Việt Nam - Philippines hao tâm boh têh jong n’hao dăng, pơk hvi tay tât rơh hun hao mhe an tâm boh bar ding.

Đah nău n’hao tâm boh hao têh jong têh dăng tay, bar ding tâm ban ŭch kan nsum rdâk njêng bôk nău kan an ƀư trong tâm boh mhe let năp tay. Mpeh ăp nkô̆ nău tâm nkual n’hanh lam ntŭr neh, bar kruanh rđău kan lah rjăp n’hao dăng tay tâm boh kan nsum lhăt, tâm kơl nsum ta ăp rgum nchră âk ding, lơn lah Liên hợp quốc n’hanh ASEAN. Bar kruanh rđău kan tâm ban ŭch ntrôl dăng ăp Bộ, n’gâng kan n’hanh n’gor bar dak kan nsum lhăt, an ƀư geh nău tam ăp nău tâm ton hŏ dơi geh đah Kruanh rđău kan bar dak, rgop ndơ̆ tâm boh têh jong n’hao dăng tay Việt Nam – Philippines lăp tâm rơh hun hao mhe.