Kêng măng 2/3 ta Hà Nội, Tổng Bí thư Tô Lâm ƀư tơm rơh pah kan đah Ban Chính sách n’hanh Chiến lược Trung ương mpeh rdâk njêng Nghị quyết trong nkra jŏ jong ntrŭt ntrôl wăng sa hun hao 2 mbrô nkre đah njêng luh trong ntĭt leo hun hao mhe. Ta rơh pah kan, Tổng Bí thư lah kloh 6 trong rƀŏng têh, ân ntrŏng năl di trong uănh têh jong, n’gluh nkô̆ nău ta rnoh têh mô hŏ tă geh n’hanh nău mĭn hun hao têh jong. Nghị quyết ân jêng mâng weh nkrum lam an trong ntĭt leo hun hao 2 mbrô bah Việt Nam tât năm 2045, mpơl nău nsrôih têh jong n’hanh trong sơch mô hŏ tă geh gay ƀư jêng ngăn ngăn nău nđơr geh hun hao neh dak.

Hun hao ân đăp mpăn, săk geh, nkrum lam, kloh uĕh n’hanh ƀư tơm êng. Gay tât rnoh ngăch n’hanh jŏ jong, ân êng uănh khlay rgâl tơm hun hao tâm lam trong kan chính trị n’hanh rêh jêng kon nuĭh; uănh aơ mô dơn lah rnoh tât hun hao wăng sa ma lah nău dơn kan chính trị rgum tơm, jăch ndăn; ntlơi bah nău mĭn ƀư an lĕ năm kan, trong ƀư êng tĭng ntŭk; ntik n’hao nău mĭn nănh ƀư, nănh dơn nău kan; dâk kan ăp kôp, tâm pă kloh rvah, kan nsum lhăt đah Trung ương, n’gor n’hanh doanh nghiệp; sŏk khoa học công nghệ, rgâl blău ƀư mhe, rgâl mbrô ƀư suan ntrôl rgum tơm bah trong ntĭt leo hun hao mhe.