Măng ntri (13/8), Tổng Bí thư Tô Lâm ndrel I ur n’hanh Mpôl ntơh măt gưl têh dak he sĭt tât Hà Nội dŭt jêh uĕh lăng hăn pah kan khâl gưl Ngih dak tât Hàn Quốc tĭng nău jă bah Tổng thống Lee Jae Myung.

Tâm 4 nar ta Hàn Quốc, Tổng Bí thư Tô Lâm hŏ geh rơh pah kan dŭt âk mpưm, âk ntil đah ăp rơh tâm nchră, tâm mâp, ôp srĭng nău đah ăp Kruanh gưl têh Hàn Quốc, mpôl kan wăng sa, văn hóa, nuĭh khoa học, mâp mpôl nuĭh Việt Nam ta Hàn Quốc n’hanh ăp nuĭh băl Hàn Quốc dêh rŏng Việt Nam. Kêng dŭt rơh khâl dja, bar ding hŏ ký ton 50 siƀŭt tâm boh đah ăp n’gâng kan, ăp mpôl, ăp doanh nghiệp n’hanh n’gor bar dak mpeh tâm boh tâm ăp trong kan n’hanh n’hao dăng tâm boh đah ăp n’gor bah Việt Nam n’hanh ăp doanh nghiệp Hàn Quốc. Ăp nău dơi geh khlay tâm trong hăn khâl hŏ jêng du n’gâng ntơm têh pơk luh plơp mhe chrat ang bah tâm boh têh jong lam lĕ rngôch đah bar dak tâm rơh hun hao mhe.