Tâm rnôk hăn khâl gưl Ngih dak tât Cộng hòa Dân chủ Nhân dân Lào, kêng măng 1/12 ta Thủ đô Viêng Chăn, Tổng Bí thư Tô Lâm hŏ mâp cán bộ Đại sứ quán n’hanh nuĭh Việt Nam ta Lào. Lôch rnôk djăt nău mbơh n’hanh nău rgop bah nuĭh ntơh măt ƀon lan ta dak bah dih, Tổng Bí thư mpơl nău rhơn rnôk mpôl nuĭh Việt tâm rnglăp, mât ndray săk tơm văn hóa, tĭng jăp pháp luật ta ntŭk, lăp rgum ndrel ƀon lan Lào n’hanh jêng ntung njŏ tâm rnglăp khlay đah bar rnoi nuĭh.

Dŭt njrăng uănh khlay lơn, ăp rnăk Việt Nam way rƀŏng sĭt mpeh ƀon tơm, uănh khlay ntĭm nti kon se mât nău ngơi Việt, nău way ơm lịch sử n’hanh văn hóa rnoi nuĭh. Lah rjăp ƀon lan he ta dak bah dih way lah du mpôl mô dơi tăch luh bah ndŭl mham rnoi nuĭh, Tổng Bí thư lah rjăp Đảng n’hanh Ngih dak mbra ƀư ăp tŏng trong kơl ƀon lan gŭ dak bah dih tâm nău ntuh kơl, kơt nti, gŭ mĭn, ntơm njêng nău kan, ntĭm nti tiếng Việt, ndơ̆ rgâl nău gĭt blău n’hanh ntrŭt ntrôl ăp nău kan văn hóa, tâm boh ƀon lan dak bah dih, bah nê n’hao dăng krêp dêh ƀon lan gŭ dak bah dih đah neh dak.