Kêng măng 11/11, ta Ngih Trung ương Đảng, Tổng Bí thư Tô Lâm ƀư tơm nar mâp măt mpôl đại biểu geh 70 rmôt, êng nuĭh ntoh lư tâm rmôt râng mât njrăng, đăp mpăn ta bah dâng lam dak. Bah rnôk ntrong ƀư dơi ƀư lơ 1/7/2024 tât aƀaơ, lam dak lĕ ndâk ƀư geh rlău 86 rbăn Rmôt mât njrăng rnă njrăng, đăp mpăn đah rlău 276 rbăn nuĭh.

Rmôt aơ lĕ pă an công an xă rlău 141 rbăn nău mbơh, ntop kơl mkra rlău 90 rbăn nău, rgop mât đăp mpăn ta ntŭk. Ta nar mâp măt, Tổng Bí thư uănh lah prêh săk rnglăy uĕh ma rmôt dơi geh, nkre nkoch đah ăp nău jêr jŏt, ŏk r’ah bah rmôt pah kan na nê̆ ta bah dâng. Tổng Bí thư mĭn lah Đảng, Ngih dak mbra jêh trong kơl, nău kơl gay rmôt ngăn ngên jêng “binh chủng” khlay tâm mât njrăng rnă njrăng, đăp mpăn. Khay tât, Tổng Bí thư đă ăp n’gâng kan, nău kan, ƀon lan ntrôl dăng nkoch trêng, ƀư an tâm ban ŭch kon nuĭh uănh tât ntop kơl ndâk njêng rmôt nâp dăng.