Tâm rnôk hăn khâl ngăn dak Cộng hòa Phần Lan, nar 21/10, Tổng Bí thư Tô Lâm n’hanh I ur Ngô Phương Ly hŏ mâp cán bộ, nuĭh pah kan ăp nhih pah kan ntơh măt Việt Nam n’hanh ntơh măt mpôl nuĭh Việt ta Phần Lan, Đan Mạch, Thụy Điển n’hanh Na Uy. Tổng Bí thư mpơl nău rngot rhơn bah năp nău rŏng bah kônh wa gŭ dak bah dih – ăp “đại sứ văn hóa” rgop bun dăp tâm boh tâm rnglăp đah Việt Nam n’hanh ăp dak Bắc Âu.

Tổng Bí thư lah rjăp, Đảng n’hanh Ngih dak way uănh mpôl nuĭh Việt Nam ta dak bah dih lah du mpôl mô dơi tăch luh bah rnoi nuĭh, lah tơm ndơ khlay an n’gâng kan rdâk njêng n’hanh mât njrăng neh dak. Nău lư mpeh nô  nău wăng sa- rêh jêng kon nuĭh n’hanh pah kan nchrăp Đại hội XIV bah Đảng, Tổng Bí thư lah rjăp neh dak dôl lăp tâm rơh hun hao mhe, rƀŏng tât ƀon lan geh ndrŏng, neh dak têh dăng, ƀon lan ƀư tơm, geh nău tâm ban, rsang rnglay.