Ôi 5/1 ta Hà Nội, Ban Nội chính Trung ương ƀư nar nkah ndray 60 năm Nar way ơm Nội chính Đảng (5/1/1966 - 5/1/2026) n’hanh wơt dơn Huân chương Hồ Chí Minh tâl 2. Ntơh măt ăp kruanh rđău kan Đảng, Ngih dak ntăm an Huân chương Hồ Chí Minh tâl 2 an Ban Nội chính Trung ương, Tổng Bí thư Tô Lâm lah rjăp, pah kan nội chính way dơi Đảng n’hanh Kruanh Hồ Chí Minh êng uănh khlay, ntrŏng lah trong kan n’gâng tơm gay mât njrăng Đảng, mât njrăng trong tĭng, mât njrăng n’gâng kan n’hanh nău dơi geh tâm di, nău leh tĭng bah ƀon lan.

Nkre, năl lah, tâm ăp rơh lịch sử, bol tâm nô nău jêr jŏt, krit jêr, ăp rơh kơn cán bộ n’gâng kan Nội chính Đảng way du nuih n’hâm tĭng jăp đah Đảng, neh dak n’hanh ƀon lan; sŏng du nău way, nâp dăng mpeh han săk; lĕ nuih n’hâm kan, mô hưp geh êng an du hê nơm, nănh rlăch ndăng mât njrăng nău di, rdâng lơh tay nău tih. Nkoch kloh, tâm rơh hun hao mhe, n’gâng kan Nội chính Đảng ân ntik n’hao nău way ơm n’gloh ang 60 năm aơ; mô rlu rgâl mhe nău mĭn, trong nkra n’hanh trong ƀư; n’hao săk tam nsŏng kơl trong têh jong; nâp dăng ƀư jăp nău khlay kan “chăm gôn” an Đảng tâm trong kan nội chính, njrăng, n’gang sa khâm, mpŭng lir, tih djơh n’hanh rgâl dơh glêh tư pháp.