Kêng măng 5/3, ta Hà Nội, Tổng Bí thư Tô Lâm hŏ geh rơh pah kan đah Ủy ban Kiểm tra Trung ương mpeh lôch jêh tĭng ƀư nău kan nsŏng kơl rdâk njêng, wat jêh trong nchrăp an Tâm nchră tâl bar Ban Chấp hành Trung ương Đảng khóa XIV.  Tổng Bí thư lah rjăp, nsing ta n’glôch jêh, nđơn tay ăp nkô̆ tâm di bah Nghị quyết n’hanh Quy định ntơm nơh; gŭ mĭn ntop tay ăp nău mĭn mhe, nkô̆ mhe, quy định mhe an tâm di đah nô nău ngăn ngăn.

Ân ndơ̆ pah kan ôp uănh, groi nđôi n’hanh tĭng jăp Đảng tâm lam trong pah kan rdâk njêng Đảng, n’hao nău mât bôk neh dak n’hanh tĭng ƀư ăp trong nchrăp têh jong hun hao neh dak ndơ̆ luh ta Đại hội tâl XIV bah Đảng. Ntrŏng ôp uănh, groi nđôi nkre lah trong ƀư rđău đă khlay bah Đảng nkre lah trong tĭng gay Đảng rmăn glêh êng, mât njrăng êng, wat jêh êng, n’hao têh êng; lah ndơ dŏng gay mât kân nău dơi kan, mât lhăt jăp, nău way neh dak; lah ndơ đăp mpăn gung trong tâm di bah Đảng dơi tĭng ƀư lhăt jăp n’hanh geh nău tam ngăn ngăn. Mpeh ăp nkô̆ na nê̆ bah Nghị quyết n’hanh Quy định, Tổng Bí thư dăn đă, rgâl dăng pah kan ôp uănh, groi nđôi rnoh tât njrăng n’gang bah ơm, bah ngai; mât kân nău dơi kan tâm rnôk mât dŏng; ban saơ geh ma nău tât bah năp rnôk jêng nău tih. Pơk hvi groi nđôi, đăp mpăn lĕ rngôch ăp gung trong, trong nchrăp, trong kơl bah Đảng dơi ƀư răp jăp, geh nău tam.